يا أغلى كل ما أملك.. وأحلى كل ما عِشتُه
يا ضحكة فوق شفايف أب.. قصاد عينُه لمح بنتُه
سألتيني: أقول لك حاجة عن بُكرا
وحشتيني.. هجيلك غصب عن بُكرا
ولو فاكرة.. وعدتك إنها فترة وهتعدي
ولا لوحدك ولا لوحدي
ولا ييجي على بالك.. تعيشي الدنيا من بَعدي
في وقت الشيلة ما بتتقل على قلوبنا
في وقت ما يبقى على طرف اللسان.. من كُتر ما تعبنا خلاص نيأس
نقول للسانّا لأ .. اخرس
نبُص ورانا ع السكة نلاقي حاجات كتير فاتت
نقول هانت
بقيت بالرعب متطمن
ومتأمّن بحض الخوف
بقيت ملفوف بشوك قنفد
بقيت في الضلمة برضه بشوف
عرفت معاكِ إن الحب مش رؤيا
وإن الحضن مش باللمس
وإن المُكتمل بالعشق ..
مش مؤمن بكلمة نقص
معايا كام سنة ع المُرّة يا حبيبتي؟
ياريت الدنيا شايلة لنا أنا وانتي
مفاجأة في استراحة في الفيلم
ويطلع كل يوم عِشناه بنبكي
كان مُجرّد حِلم