كافتيريات الإسكندرية ترفع الأسعار: البحر للأغنياء
الكافتيريات المنتشرة على كورنيش الإسكندرية
استغلت كافتيريات ممرات كورنيش الإسكندرية، بداية موسم الصيف وبدء استقبال المدينة وفوداً من المصطافين، ورفعت الأسعار بشكل مبالغ فيه، لدرجة أن أقل مشروب وصل سعره إلى 25 جنيهاً.
«أحمد»: لو أسرة مكونة من 4 أفراد هتدفع 150 جنيه.. و«حنان»: الواحد عشان يقعد على الكورنيش لازم يدفع دم قلبه.. و«السياحة والمصايف»: فسخ التعاقد مصير كل مخالف
«لازم كل شخص يقعد على كرسى يدفع 25 جنيه ده أقل حاجة، وماينفعش واحد قاعد مايشربش، لما تطلب عصير تدفع من 30 لـ35 جنيه، يعنى لو أسرة مكونة من 4 أفراد تدفع 150 أو 200 جنيه»، بلهجة حادة عبر أحمد عبدالجواد، مدرس، عن غضبه من قوائم الأسعار الجديدة التى وضعتها كافتيريات الممر.
وأضافت حنان قاسم، ربة منزل: «دلوقتى علشان نقعد على الكورنيش لازم نقعد فى الكافتيريات وأسعارها بقى مبالغ فيها أوى، بقت بتنافس الكافتيريات الكبيرة، لا خلوا سور البحر للناس الغلابة ولا عملوا كافتيريات بأسعار معقولة لمحدودى الدخل».
اللواء أحمد حجازى، رئيس الإدارة المركزية للسياحة والمصايف بالإسكندرية، قال إنه لا تهاون مع المستغلين فى كافتيريات ممرات الكورنيش أو غيرها أو فى الشواطئ أو مع أى مستأجر يرفع الأسعار: «أى حد هيخالف القواعد المتفق عليها هيكون مصيره فسخ العقد، الأول بنلقى تحذيرات وتهديدات وإنذارات وإذا كررها بتكون مخالفة مالية كبيرة، ومن ثم فسخ التعاقد».
وأضاف لـ«الوطن»: «الأسعار معتمدة من قبل إدارة السياحة وكل الكافتيريات ملزمة بتطبيق الأسعار المعتمدة»، مؤكداً أن مراقبى التفتيش ومديرى الإدارات فى الشوارع لمراقبة الأسعار مع حلول الصيف وتم إلقاء تحذيرات وإنذارات لعدد من كافتيريات الممرات بمنطقة كليوباترا وسبورتنج.