«ثابت» اشترى «قصب» بـ4 آلاف جنيه وباعه بـ2000: «اللى إيده فى الميه.. مش زى اللى إيده فى العصير»
«ثابت» فى محل العصير بشبرا الخيمة
وسط حالة من الركود فى البيع والخسارة فى العائد، فكّر ثابت، صاحب محل عصائر فى شبرا الخيمة، فى إغلاق المحل لعدم قدرته على الاستمرار وسط موجة الغلاء التى أدت إلى خسارته. لدى «ثابت» ابنتان، الصغرى تبلغ من العمر 6 أشهر، يشعر بحزن لأنه لا يملك ثمن غذائها، علبة لبن مدعم، لا يعرف من أين يأتى بها، ولذا اهتدى إلى إغلاق المحل الذى يكلفه كثيراً رغم أنه مصدر دخله الوحيد.
«القصب والفاكهة والكهرباء والسكر غاليين، اشتريت قصب بـ4 آلاف جنيه وبعته بـ2000 جنيه، يبقى كده حرام، خسارة محدش يرضى بيها، المحل ده فاتح 6 بيوت، هجيب منين وأصرف عليهم منين؟»، بكلمات يغلب عليها اليأس أكد «ثابت»، 32 عاماً، أنه يعانى من ارتفاع الأسعار من جانب ومن تعنت حى شبرا الخيمة معهم من جانب آخر بسبب الكراسى والشجر الموجود حول المحل بحجة أنها من إشغالات الطريق: كنت بدفع كهرباء 500 جنيه بقت 1000 ودلوقتى وصلت لـ2000 جنيه، طب المحل جايب كام عشان أدفع كل ده، غير أجرة اللى شغالين فى المحل».يواصل «ثابت» شكواه: «كيلو السكر بيقف علىّ بـ8 جنيه ومش لاقيه، ولما غليت كوباية العصير من جنيه لجنيه ونص الناس اعترضت وقالت لى بتغلّى علينا ليه هى ناقصاك، طب أعمل إيه؟». يشعر بائع العصير بإحراج أمام زبائنه عندما يدخلون إلى محله على أساس أن كوب العصير بجنيه ثم يكتشفون أنه أصبح بجنيه ونصف الجنيه: الناس كلها تعبانة واحنا مش عارفين نروح ولا نيجى».