وحشني لمة الصحبة على القهوة
في ليل شتوي
بنتدفى بحكاوينا
ونتفرج على الدوري
ونتخانق مع بندق
عشان بنشجع الأهلي
وهو يرد ويزعق
ويفتح عينه ويبرق
يقول: جمهور فريق “جهلي”
وينده عبد الحليم: يا كمااااااااااااال
قوام الشيشة ولع لي
ويجي كمال معاه شيشة
وقهوة كمان عشان لطفي
وتحلى القعد لما يهل
علينا من بعيد خيري
ويتأخر شريف سندي
فيضطر إنه يبات عندي
……
يا ريتها دامت الأيام
ودامت لمة القهوة
بقينا كبار قوي وقدام
وعدى العمر على سهوة
خطف منا حلاوة روحنا والضحكة
وفرقنا في 100 مشوار
و100 سكة
مفيش مسرح يجمعنا
ولا جماهير بتسمعنا
ولا طارق يصدعنا
وودعنا إسماعيل حمدي
ودمعنا
مش هنشوفك خلاص من تاني
يا سمعة
ولما هنفتكر سيرتك
هتنزل م العيون دمعة
…..
وعزينا في صديق العمر
وروحنا قعدنا ع القهوة
وشدينا علي إيدين بعض
شتمنا كل لحظة بعد
وقلنا خلاص
ما عاد فيه وقت للفرقة
لابد يا صحبة نتقابل
ولو حتى في يوم سرقة
حضنا بعض ومشينا
وفاكرين إننا رجعنا
وراح نتلم من تاني
وبصت لينا دنيتنا
وضحكت ضحكة مش ولابد
وبعدت بينا من تاني
وسيبنا نفسنا ليها
ولا بنصد ولا بنرد
مفيش بقى وقت للمة
ولا للفرجة على الدوري
خلاص مبقاش شريف سندي
يبات عندي
ولا بندق بيتخانق
عشان بنشجع الأهلي
بنتجمع في بوست عقيم
على فيس بوك
نهني مرة ونبارك
ومرة نواسي ونعزي