لا يهمنى اسمك.. لا يهمنى عنوانك.. يهمنى الصورة اللى على «بروفايلك»
«يوسف» يستخدم صوراً تعبر عن حالته
مواقع التواصل الاجتماعى المختلفة وعلى رأسها موقع «فيس بوك» تمثل شيئاً أساسياً وحيوياً فى حياة الشباب وتعتبر نافذة على عالمهم يقضون عليها العديد من الساعات ويسجلون بها حضورهم على الشبكة الافتراضية، حتى إنك تستطيع أن تجد أى شخص تبحث عنه من خلاله كما تستطيع تكوين فكرة مبدئية عن الاهتمامات والآراء الشخصية والميول السياسية للشخص من خلال صفحته على «فيس بوك» من دون أن يكون هناك سابق معرفة مع هذا الشخص، لذلك يحرص كثير من الشباب على جعل صفحاتهم الشخصية تعبر عنهم وعن اهتماماتهم وعن الأحداث المتغيرة فى حياتهم مستخدمين صوراً تعبر عنهم بشكل أو بآخر، والبعض الآخر لا يهتم بها ويعتبر «فيس بوك» مجرد موقع للتواصل و«الشات» مع الأصدقاء.
آية خالد ترى أن «فيس بوك» بالنسبة لها موقع تواصل تحبه لأنه يقرب الناس من بعضها: «بحب أنزل صور ليّا على البروفايل بتاعى وأنا لوحدى وتكون واضحة عشان لو حد بيعمل عنى سيرش يعرفنى وأكتر حاجة بحب أنزلها كتير على صفحتى صورى عشان بحب أتصور كتير وبفرح لما أنزلها وخصوصاً صور سناب شات الجديدة عشان مبهجة وفيها أشكال كتير بتعجبنى».
وأضافت «آية»: بحب أنزل بوستات عن نفسى وعن حياتى وعن حاجات عامة وأكتر حاجات مبحبش أتكلم فيها أو أعمل لها شير عندى النكد والسياسة لأنى مبحبهاش وبتعمل اختلاف وبحس من اللى أنا بنشره إن أى حد يقدر يفهم شخصيتى من البروفايل بتاعى».
وشاركتها نور شومان (20 سنة) فى حب نشر الصور على «فيس بوك» قائلة: «هو بوابتى اللى بفرغ فيها طاقة وبتابع بيها أخبار الناس وبعرض فيها جزء كبير من أفكارى وجزء بسيط من هزارى وبحب أنزل صورى عليه عشان أسجل اللحظات الحلوة والمهمة، خصوصاً لما تكون صور فى مكان جديد أو مكان بحبه أو صورة بضحك فيها وبحب قوى الصور اللى بيتيحها برنامج سنو عشان بيعمل حاجات غريبة وبيحط لى وشوش وإيموشنات معبرة». وأضافت «نور»: «مبحسش إن البروفايل بتاعى على فيس بوك بيعبر عنى قوى بس ممكن يكون بيوضح اهتماماتى عشان أنا مبكتبش حاجات شخصية عن نفسى عليه ولا بهتم أحدّث بياناتى غير لو حاجة مهمة قوى، وكنت بكتب آراء سياسية بس دلوقتى بقيت أحب انشر هزار وحاجات كوميدية».
«الفيس بوك بالنسبة لى حياة».. هكذا قال يوسف -أحد الشباب مستخدمى فيس بوك- مضيفاً: «أكتر حاجة بحبها فى الفيس بوك الشات وبحب أنزل صورى دايماً عشان أشوف رأى الناس فى كل خطوة فى حياتى وكمان رسوماتى اللى الناس فى مجال الفن بيعلقوا عليها ويفيدونى برأيهم».
وأضاف «يوسف»: صورى اللى بنزلها على صفحتى على الفيس بوك بتعبر عن حالتى بنسبة 80% بس وبنقل عن طريقها قناعاتى وإحساسى الحقيقى لكن الـ20% الباقيين بتبقى صور مالهاش دلالات حقيقية وبقصد بيها توصيل رسالة لناس معينة عندى زى مثلاً لما أبين إنى سعيد وأنا مش طايق نفسى عشان أثبت لناس إنهم مش فارقين معايا».
بينما قالت بوسى أحمد (23 سنة): «مبحبش الفيس بوك وبالنسبة لى ولا حاجة.. أنا عملته من زمان عشان أكلم أصحابى ودلوقتى بقلب فيه فراغ وبعرف منه أخبار الناس ومش بحب أنزل كل صورى عليه عشان بخاف حد ياخدها».