«ساندويتش على الحيط».. مبادرة لمساعدة الفقراء من غير إحراج
أول مطعم فى العبور ينفذ الفكرة
«ساندويتش على الحيط».. مبادرة تداولها نشطاء مواقع الـ«فيس بوك» قبل أيام لمطعم سورى بمدينة العبور، بعد تعليقه لافتة توضح الفكرة للزبائن الذين يهدفون لمساعدة غير القادرين على شراء الأطعمة، لكنها فى الحقيقة مبادرة لطالبين فى أولى ثانوى، طبعوا «بوستر» بفكرتهما وعلقوه على باب المطعم بعد عرضها على صاحب المطعم والحصول منه على موافقة بتنفيذها، متمنيين أن تطبق فى مطاعم أخرى بأماكن مختلفة.
«الفكرة جت لى من البداية وأنا واقف باشترى ساندويتش مع زميلى فى مطعم ولقينا واحد قسم الساندويتش بتاعه بالنص، أخد النص الأول لنفسه والنص التانى إداه لواحد غلبان كان واقف يتفرج على الناس وهى بتاكل»، قالها محمد مجدى، طالب بالصف الأول الثانوى بمدرسة عمر بن الخطاب التجريبية بالعبور، وصاحب المبادرة، موضحاً أن فكرته هدفها أن يشترى الأشخاص الذين يرغبون فى مساعدة المحتاجين «2 بون» لأى ساندويتش يرغبون فيه ويتركون «البون» الآخر على الحائط ليحصل عليه من لا يستطيع شراءه دون إحراج: «فى ناس كتير غلبانة مابتقدرش تشترى أكل وبيبقوا عندهم عزة نفس ومش بيطلبوا، عشان كده فكرت أنا وزميلى محمد عصام إننا نعمل خير بطريقة جديدة، ونخلى اللى مش قادرين يشتروا أكل ياكلوا من المطاعم من غير ما يتحرجوا».
لم تتوقف فكرة محمد مجدى، 17 عاماً، وصديقه على نشر فكرته فى مطعم واحد حسب قوله: «إحنا طبقنا فكرتنا فى أقرب محل جنب بيتنا، صاحب المطعم وافق على الفكرة وإحنا اللى طبعنا البانر بـ30 جنيه وعلقناه، وكل يوم بنروح المطعم بنلاقى ناس كتير تجاوبت وحاطين بونات الساندويتشات على الحيطة، وفى ناس غلابة بتيجى تاخد منها»، مؤكداً أن الهدف من المبادرة هو نشر الفكرة فى المطاعم الكبيرة وفى مختلف المناطق: «عندنا طموح أن الفكرة دى تخرج من مدينة العبور وتتنفذ فى كل المطاعم، وإحنا علينا البانر، الأهم إننا نساعد الناس الغلابة من غير ما نحسسهم بإحراج».