حفلة غنائية لتكريم الأمهات بـ10 جنيه بس: «فسّحها فى عيدها»
جانب من التجهيزات للحفل الغنائى
«أمهاتنا عرفوا يدلعونا ويدلعوا ولادنا.. بس كتير منهم ماخدوش نفس الدلع».. دعوة لحفلة غنائية تحت عنوان «فسّحها فى عيدها» للاحتفال بـ«عيد الأم» يوم الثلاثاء المقبل بمركز دوار للفنون بمنطقة وسط البلد، لإسعاد الأمهات واستعادة الذكريات معهن وتكريمهن على مشوارهن كأمهات مثاليات فى تربية أبنائهن.
تجهز داليا إيهاب، فنانة أداء صوتى، لإقامة حلقة من الغناء تروى من خلالها قصصاً حقيقية لبعض الأمهات المشاركات فى الحفل، حتى تظل ذكرى مبهجة لهن: «هغنى عن المراحل اللى بتمر بيها كل أم من ساعة ما تكون حامل لحد ما تشوف ولادها أطول منها وهى فرحانة بيهم.. هنخليهم يرجعوا لورا شوية ويشوفوا نفسهم»، تعد «داليا» بتقديم الأبناء هدايا لأمهاتهم: «ست الحبايب مش واحدة بس، أمهاتنا كلنا شقيوا معانا».
يقام الحفل، حسب الشابة الثلاثينية، فى الثامنة من مساء عيد الأم: «عملنا الحفلة بالليل عشان كل واحد يروح الشغل ويروح يلحق يجيب مامته وييجى.. وعشان كل الأمهات تحضر وتشوف نفسها متكرمة فى عين كل الناس مش عند ولادها بس»، على أن يكون دخول الحفل بمقابل رمزى 10 جنيهات: «عشان نضمن إن كل أم هتنورنا والمكان مريح وكلنا هنستمتع».
ويتضمن الحفل أيضاً عرضاً لمنتجات الجمعيات الخيرية فى معرض صغير، وشراءها كهدايا للأمهات، على أن يعود الربح إلى الجمعيات الخيرية مرة أخرى: «بنفرّح الأمهات وكمان الفلوس اللى هيشتروا بيها هتتصرف على الجمعيات».