بعزيك والحزن قايد نار
إنت أخويا حبيبي وجار
إنت زميلي صاحب عمري
راسمين حلم طول المشوار
أيوه مصيبة جرحت روحنا
هزت جوه القلب جدار
طفَّت لينا شموع العيد
خلَّت حزن في كل ديار
خلَّت كل دموعنا تسيل
خطفت بهجة وناس أبرار
إرهاب جايب فتنة وجاى
عايز يمنع بيننا عمار
شاف الحب بيروي قلوبنا
هب الحقد في قلبه شرار
عايز يفرِّق بيني وبينك
يهز بلدنا واستقرار
عايز يدبح فينا الحب
عايز دم يسيل أنهار
عايز يزرع شوك في طريقنا
نمشي في فتنة مع التيار
عايز يجني هدفه الأسود
نفسه بلدنا في يوم تنهار
بس الوحدة سلاحنا الأقوى
ضد عدو جبان غدار
كنت مسيحي مسلم واحد
سد منيع ضد الأخطار
رمز الحب الأزلي الطاهر
شعب موحد أحلى شعار
لو جات شوكة لواحد فينا
نلقى الحزن كبار وصغار
لو جات فتنة ودخلت بيننا
نشرب كل كاساتنا مرار
أيوه الجرح كبير وصايبنا
قلب بيدمي الليل ونهار
بكل صمودنا وحب وطنا
كل عدو رايح يحتار
مهما يحاول أكيد هيخيب
يجني بإيده الخزي وعار
إيدي في إيدك تشفي جروحنا
نحمي بلدنا من الأشرار
مصر وطنا الحضن الآمن
مصر راعيها عظيم ستار