حبيبتي مسافة.. نقطتين
أنا بكتب وكلي حنين
عن الأيام اللي مش فايتين
عن الدنيا اللي سارقانا
وحادفانا لناس تانين
أنا بكتب وكلي حنين
ومش مشغول ولا مهتم
كلامي إزاي هيوصلك
يا أول سطر فـ جوابي
وأول وردة فـ دولابي
يا أول رعشه فـ إيديا
وأول سر يتقالك
أنا فاكر ومش بنسى
ولا ضحكة ولاهمسة
ولا شارع مشينا فيه
ولا طيفك ولا ضِلك
وتشهد حصة العربي
وشخبطتي وقلمي الجاف
وخط إيديا اللي من سوءه
مالوش أوصاف
أنا فعلاً عليكي بخاف.
أنا يا حبيبتي من غيرك
بلاد ضلمة وليل بلا ناس
جسد ع الأرض بيخطي
بلا معنى بلا إحساس
هوانا إزاي صِبح وردة تدوسها الناس؟
ختاماً : منى وإليكي
أنا هرسم هنا عنيكي في كل مكان
على بابي وع الجدران
عشان لو توهت عن نفسي ترجعني
ولو فكرت يوم أضعف هتمنعني
ولو هصرخ من الوحدة
هلاقي عنيكي بتطبطب.. وتسمعني