عيونك.. مُسكرات الروح
شفايفك.. مُذهبات العقل
يا حضرة ف قلبي فين ما بروح
غيابك عني مش بالوقت
ومش مسافات
ومين يقدر.. يحدد بعدنا بمعاد
يا نور الله في ملكوتي
وشمس الدنيا دي فانية
أموت ف الدنيا لو أقدر
وأعيش فيكي حياة تانية
.....
زهدت فيكي البشر
وبنيتك ف قلبي مقام
يا قبلة المنتهى
صليت عليكي إمام
كبرت ف عيونك
سلمت لك وحيي
آميت بروحي ف كون
وعبدت مش قصدي
في جمال عيون مكنون
وحدت روحنا اله
للعشق والعشاق
فكفرت باللي انتهي
وآمنت باللي اشتاق
درويش
درويش ف حضرة ليل
سكران بتسبيحك
على سبحة من ريحك
ف خُديني في ريحك
فاصبأ بضلع الكون
وآمنت بحنينك
يا أم الخدود رمان
والضحكة مكسوفة
الدنيا لو غنوة
ف عنيكي معزوفة
خطاويكي ليل إسود
ونجوم على مواويل
أنا تهت في سكة
أحلامي ع الدكة
وكلامي بقى ربكة
والليل ملوهش دليل
دليني..
دليني لو خطوة
أنا نفسي ألاقي البير
ظمآن أنا لرشفة
ما اظمأ لبنى الحوا
إن ما فيكي ف يوم
فأنا عشت من جوه
كتر الكلام.. علة
خير الكلام.. قلة
سبحت فيكي العشق
وتليت آيات صبري
وسجدت للمعبود
ودعيت.. فكنتي إنتي