شوارع إشارات
وبيوت وحارات
مرسومة بإيد فنان محروم
ولاعمره ارتاح ولا داق النوم
مش سايب من إيده الريشة
لاجل ما يرسم فـ وشوش الناس
ضحكة بريئة فـ ظل العيشة
بيحاول يضحك فـ الرسمة
يلقى البسمة مفيهاش إحساس
ومنين هيلّون إحساسها
واللون م الأصل مالُهش أساس
فيعاود يرسم أحزانهم
وبلون فرحان يخفي الآمهُم
فـ الواقع بيكون دايما ساكت
فـ اللوحة يدندن بكلامهم
فيردّوا عليه أهل اللوحة
إياك ترسمنا بلون باهت
وكفاية دموعنا المجروحة
مكتوبة علينا بلون واحد
فرّحنا وفرّح أحزانا
واوعاك تكفر باللي خلقنا
انشر ألوانك وارسمنا
والضحكة بتقتل أوجاعنا
ليه الألوان فينا بتناهد
وخيالك فينا ليه بيعاند
ارسمنا بشر مالهاش ألوان
وإن مقدرتش خليك ساكت