1- تابعت ردود أفعال الجميع من وقت نزول فيلم "الأصليين"، دور السينما واللى معظمها ماكانتش مشجعة تماما ، ولكن ساقتنى الظروف وقررت أتفرج على الفيلم اللى كتب السيناريو بتاعه أحد أيقونات التأليف الروائى فى الكام سنة اللى فاتوا "أحمد مراد" -اللى بالمناسبة أنا مش من دراويشه تماما- وأخرجه الموهوب إبن الموهوب مروان حامد.
2- تخيل معايا إنك سبت الوظيفة اللى إنت فيها حاليا ورحت استلمت وظيفة أحلامك، وإنت لابس طقم أحلامك وراكب عربية أحلامك.. تخيلت؟ اتبسطت؟
3- الفيلم عبارة عن مباراة تمثيلية بين ماجد الكدوانى وخالد الصاوى، اللى نجحوا تماما فى إضفاء نوع من الغموض بالنسبة للحكم على الفيلم.. هو أنا مبسوط بس مش فاهم!
4- لو خبطت عليك باب شقتك وسلمتك استمارة 6 من شغلك الحالى اللى مش بتحبه، وقلت لك البس الطقم الجديد الحلو ده وروح استلم وظيفة أحلامك كمان ساعة.. هتطمن؟ ولا هتحس إن فيه حاجة غلط؟
5- مشاهد طويلة تصل لمرحلة الملل، وخطوط بتدخل فى بعضها بتزيد التوهان وبتحطك جوه دايرة أكبر من الحيرة.. أنا جيت الفيلم ده ليه؟ هم مش قالوا مش حلو ما تدخلوهوش!
6- خيالك طمنك أكتر، لأن الواقع بيقول إنك ما سبتش الوظيفة وفي أمان، علشان كده كنت مبسوط.. بس المعرفة اليقينية إن "الشغلانة طارت ويا عالم" بدلت الانبساط بالقلق.. هكذا هي المعرفة يا صديقى.. تقتل الخيال دائما.
7- يعنى دول مين اللى اشتغل معاهم سمير عليوة "ماجد الكدوانى"، وليه اختاروه هو؟ آه مؤلف الفيلم يعنى عايز يقول إن من راقب الناس مات هما؟ طب ما هي بسيطة أهى! ولا لأ هو قصده حاجة تانية أنا مش فاهمها.. مش كنت دخلت فيلم السقا؟!
8- خيال أنور السادات ساعده فى إنه يدخل سينما ليلة الثورة، لأن معرفته بنجاح الحركة من فشلها ماكانتش يقينية.. ادخل كدة جوة خيال السادات وهو بياخد القرار.. عبقرى مش كدة؟ لو نجحت فأنا معاهم ولو فشلت فعندى فرصة تانية.. هكذا هو الخيال يا صديقى.. ينقذ المعرفة دائما.
9- تقريباً فهمت.. أو بقنع نفسي إنى فهمت.. هم قصدهم إن الفراعنة كان "الخيال" هو روح الوطن عندهم.. علشان كدة حلقوا لفوق فى السما وسبقوا العالم.. أما روح الوطن عندنا حاليا بقت "المعرفة"، مشغولين بمعرفة كل شيء عن كل شيء وعن كل حد.. فوقفنا محلك سر.
10- "الخيال أهم من المعرفة.. ألبرت أينشتين".. الجملة الافتتاحية لفيلم الأصليين.. لو حد سألك عن رأيك فيه.. قول له خد بالك منها.. هم بيغمزولك علشان تفهم!
جرب تقرأ الأرقام الفردية ورا بعض.. والزوجية ورا بعض.