أربع حيطان
وأربع شنط ومرتبة ولحاف
ساكن في ليل خواف
بيذل في العاشق وفي الهربان
أربع حيطان قضبان
ليلهم غبي وطويل
تفضل تقول مواويل
للغربة والعيشة
افتح بقى الكيسة
طلع عشاك واطفح
ومفيش هنا مطرح
للجاي وأحلامه
في الغربة ناس ياما
بيحاولوا يتحاموا
في الحيطة والقضبان
ويبصوا ع العالم
من شاشة وهمية
خايفين يواجهوا القدر
ويعزموا النية
لمواجهة الأشياء
ومواجهة الواقع
خايفين يواجهوا الحلم
برصيف هواه ساقع
أربع حيطان وأربع شنط
ومرتبة ولحاف
في الغربة لو هتعيش
طاطي وكون خواف
أربع شنط فيهم كفن
فيهم هموم فايحة
اكتب عليهم اسمك ثلاثي
واملا باقي اللايحة
دون حروف حبيبتك
فوق سوستة الشنطة
ارسم قلوب بالنظر
وتبت قوي البنطة
طلع سجايرك
احرق الباقي في مشاعرك
حط حلمك تحت رجلك
واعرض كمان سعرك
تايه ومتغرب
في بلاد رصيفها وسيع
ماشي في طريق الصبر
لكن تملي بضيع
أربع حيطان وأربع شنط
ومرتبه ولحاف
لملم همومك جوا روحك
وإياك تكون متشاف
مرتبة ولحاف فوق سطرين بلاط
متكسرين من دق رجلين البشر
عايش وبتعايش على شكل نومة الخطر
بحكي لسقف الأوضة عن نفسي
وبحكي عن الأيام
عيل وشعره أبيض ما بين لقا وسلام
ملهوش مكان يأويه
ولا إيد تشد إيديه
ولا صحبة تسمع له
كل اللي يشفع له
بنوتة حلوة وأهل يدعوا له
ماشي في كون وطريق
عرضه شبه طوله
أربع حيطان وأربع شنط
ومرتبة ولحاف
اجمع رصيد حلمك.. "عفن"
لو "ع " بدالها الكاف