كلمات بترفرف فوق ودني بتقولي حاجات
وحروف بترتب أوضاعها على نوم وبيِات
وأقلام متخاصمة بتتصالح على سطر وسطر
ودا كله عشان شفُت إمبارح بنوته فــ قطر
سبحان الخالق فـ عنيها أشجار وغابات
وطبيعة بتوصف مفاتنها على عزف نايات
وكمنجة بتلعب مع عودها السرحان مقامات
من كُرد وسيكا ونهاوند.. وحجاز وبيات
فـ إيديها لا دبلة ولا خاتم ولا حتى سوار
أنا قلبي اتنطط م الفرحة ما خلاص اختار
الشعر السارح م الطرحة كان ليل فـ نهار
بـيبوح للشمس بأسرارها ويقول حكايات
شفايفها الوردي المرسومة بين قوس خدين
محتاجه لـ 100 شاعر واعر ينزفوا دواوين
وفـ وصفك يا أميرة قطري أنا قلمي حزين
من حفظ الورقة فـ كرستي شكل النهايات
وتاخدني حروفي وهلوستي من دار للنار
فـ تخوني ظروفي وتحرمني وتسبني أنهار
وتموت البنت فـ معركتي من أول بار
وأنا عارف حظي من الاول مع أي بنات
كمسري كان واقف مداري ورا ضل الخوف
قالي يا منّيل ليه ساكت من إيه مكسوف
كلها كام ساعة وراح تنزل إعمل معروف
ولا أنت حكايتك إيه قولي من غير حوارات
وريني تذكرتك لأ يابني شكلك مش فاكر
سرحان فـ جمالها وحلوتها ومعكش تذاكر
قوم يلا اتنحنح قوم روح مش طلبه عساكر
ولا طلبه الناظر فـ محطة يديني جزائات
قوم يلا ......... منبه بيرن فـ بقوم من نومي
عرقان مخضوض لأ مستعجل فلبست هدومي
للقطر ميعاد لو فات مني مش هلحق يومي
وأنا يومي تملي مجهزلي متاريس وكمين
فـ الزحمة إنتحرت تذكرتي تحت الرجلين
والقطر اتحرك وأنا قطري كان قطر شبين
فـ جريت وركبت المقصورة بهدوء ويقين
والبنت إياها فـ أحلامي ظهرت قدامي
كمسري بيخبط على كتفي فبقوله ثواني
وبقلب ف هدومي همومي وهى مزولاني
بصيت فـ عنيها لقيت نفسي تايه مسكين
فـ لقيت ضحكتها بتسألني تذكرتك فين؟