يا دبلة الخطوبة عقبالنا كلنا ونبنى طوبة طوبة فى عش حبنا...
ثانية واحدة يا أستاذة شادية.. حرف النون بتاع نبنى ده جديد لانج على ودنى.. أنا الراجل وأنا اللى ببنى كل الطوب حضرتك!
أنا اللى بجيب شبكة بمبلغ وقدره، ومهر وهدايا، وأنا اللى بجيب شقة الزوجية، وأنا بوضبها كلها من أكبر حاجة لأصغر حاجة، وأنا اللى بجيب العفش، وأنا اللى بجيب الأجهزة الكهربائية كلها، من أول الغسالة لحد الكيتشن ماشين حضرتك.
وأنا اللى بجيب كل التحف والأنتيكات، وأنا اللى أكلت الجبنة، وأنا وأنا.
الراجل مطحون بجد من أول ما بيلبس الست الدبلة وبيخش فى دايرة مالهاش آخر.
ثانية واحدة بس يا برنس لإنى شفت ابتسامة على وشك بالاستعطاف وقد إيه إنت مقهور.
الست هى اللى هتستخدم الثلاجة علشان تشيل الأكل لحضرتك، وهى اللى هتغسل لك هدومك فى الغسالة اللى حضرتك جايبها برضه، وهى اللى هتطبخ وهى اللى هتكنس.
هى اللى كانت قاعدة آخرها تسوى شوبنج هدوم وبرفانات، بس دلوقتى هتسوى شوبنج حفاضات أطفال!
وهى اللى هتستحمل وجع الحمل والولادة، وإن حمادة طلع شقى زى أبوه، وإن ميس عايدة فى المدرسة عايزة الواجب محلول، وتقعد تساعده فيه.
ده غير إن أكيد الست هتبنى برضة معاك فى الطوب بتاع عشكم، ومش هتسيبك تبنيه لوحدك.
إحنا آسفين يا أستاذة شادية اتفضلى كملى الأغنية.. هو عرف غلطته خلاص ومش هيقاطعقك تانى.