إزاى ننسى حد بنحبه
النسيان نعمة من الخالق لا بد من استغلالها عندما نتأكد من أن العلاقة التى تجمعنا بالحبيب أصبحت علاقة مشوهة، سامة تسمم أيامنا، أجسادنا وأنفسنا، وصدقونى العمر أقصر من أن نضيعه مع من لا يستحق تحت ما نسميه خطأ بالحب، فالحب الذى لا يمنحك أجنحة لتحلقى بها امنحيه بعض الجهد ليصبح ذكرى سيئة لا أكثر، وإليكِ 10 خطوات تساعدك على التخلص من هذه الذكرى وتساعدك على أن تبدأى حياتك من جديد، اقرأى ونفذى وادعى لى:
1- بلوك على تويتر، على الفيس بوك، انستجرام، أى حاجة «بلوك».
2- هداياه، دباديبه، مجاته، سلاطاته ببابا غنوجه، اجمعيهم فى كيس وابعثى بيهم له واطلبى هداياكى فى المقابل ليتأكد أن الموضوع انتهى.
3- امسحى رقمه من على الموبايل.. غيرى الرنة، غيرى الموبايل.. انسى الموبايل.. ولعى فى الموبايل.
4- أعلم أنا الحنية والأغانى التى تذكرك به والليلة دى.. ماتتسمعش.. اسمعى أناشيد وطنية.
5- غيرى، التغيير مهم جداً.. غيرى شكلك.. اعملى نيو لوك، غيرى فى غرفتك.. غيرى أى حاجة.. غيرى حياتك.. عيشى.
6- الرياضة علاج سحرى.. لأنها مش بس هتظبطك وتخليكى مزة السنين.
لأ دى كمان بتساعد الجسم على إفراز الهرمونات المسئولة عن السعادة، يعنى بعد ما هتلعبى هتحسى.. آه.. الحياة مابقتش وردى قوى بس الحياة أحسن.
7- تعلمى شيئاً جديداً.. خذى دورات للتطوير من إمكانياتك، لديكِ هوايات مارسيها.. الحاجات دى بتصبر كتير.. وهتخليكى تطلعى من المرحلة دى حاسة إنك بقيتى أحسن.
8- الانتقام فكرة بتسيطر على الواحد مليون فى المية «أنا عايزة أحسره على نفسه.. أنا عايزاه يتعب».. على فكرة أى خطوة ستقومين بها الآن لن تجعله «يتحسر» لكن الانتقام الجميل والذى سيؤثر فيه بالفعل هو رؤيتك أفضل، أنجح، أسعد، فسيشعر وقتها أنه خسر كثيراً لأنه لم يستطع الاحتفاظ بك.
9- اخرجى.. ماتقعديش فى البيت مع نفسك علشان ماتتهبليش، شوفى أصحابك فين واخرجوا، استمتعى بالشمس.. استمتعى بالحياة.. عيشى حياتك.
10- آخر وأهم نقطة علشان دى كتير بيقعوا فيها، الثقة فى النفس.. مش معنى إنه سابك إن إنتى وحشة أو رخمة أو إن شخصيتك مش كويسة، إطلاقاً ولكى تتأكدى من هذا الأمر ولكى تنسيه بأقصى سرعة ممكنة أحضرى ورقة وقلم.. اقسميهما نصفين، اكتبى فى النصف الأول كل مميزاتك وفى النصف التانى كل عيوبه.. واتوصى.
ضعى هذه الورقة بجانب السرير.. وكلما شعرتى بالضعف بصى فيها هتبوسى إيدك وش وظهر.