** مشهد بعنوان: "سيد الموظف"!. = (إلتقى حامد وصديقه سيد قُشَاط بالعتبة فى نهار رمضان..سيد بيده كيساً اسوداً وقد انتفخ بحصيلة التسوق..يسير الاثنان فى اتجاه موقف الميكروباصات وأثناء سيرهما يتبادلان الحديث) ــ حامد: كل سنة وانت حلو ياعزيزى. ــ قُشاط: وانت طيب ياعم..(ثم ببعض العصبية) هى شغلانة؟! ــحامد:هههههههه.معلش،اناعاذرَك طبعاً. ــ قُشاط : عشان السجاير يعنى؟ ــ حامد:لأ.. علشان أول سنة صيام بتبقى صعبة شوية!. ــ قشاط(بصوت خفيض): ماتزعَّقْش..ماتفضحنيش. ــ حامد : ماشى ماشى..بس بجد إيه رأيك فى الصيام؟ ــ قشاط : ماكنتش اعرف انه حاجة جميلة ورائعة بصراحة. = (يستقلان ميكروباص..يجلس قشاط بجوار سيدة عجوز ، ويضع الكيس الكبير بينه وبينها) ــ السيدة"وهى تزيح الكيس": وسَّع ياخويا الكيس الكبير ده..هو تقيل كده ليه؟..فيه إيه ده؟ ــ قشاط"بقنعرة": شوية قراصيا،على جوز،على لوز،على بيكان،على شوية كاجو. ــ السيدة"تدعو بتضرع": ربنا يشفيك يابنى..كل دى أدوية من الأجزخانة؟!. ــ قشاط : أدوية إيه ياحاجة..دا ياميش . ــ السيدة"بعفوية": يَامِيش الحديدى؟ ــ قشاط : ههههااى..لأ..ياميش رمضان،كل سنة وانتى طيبة. = (يتدخل سائق الميكروباص فى الحوار) ــ السائق: هو سيادتك بتشتغل ايه بالظبط ياباشا؟ ــ قشاط"باستعلاء شديد": أنا موظف حكومة. = (فجأة.. يغير السائق خط سير الميكروباص المعتاد) ــ قشاط :رايح فين ياجدع؟!!. ــ السائق والركاب"فى صوت واحد": مشوار صغير لجهاز الكسب غير المشروع. ــ قشاط "بدهشة":ليييييه؟!. ــ السائق:هو فى موظف بيشترى ياميش اليومين دول؟! ــ قشاط"بذعر":ماتقول حاجة ياحامد؟ ــ حامد:أقول لك ايه؟..أنا لواعرف انك شايل الحاجات دى فى الكيس ماكنتش مشيت معاك. ــ قشاط : ليه يعنى؟! ــ حامد: الحاجات دى دخلت جدول المخدرات فى الأجزخانات ياقشاط.