سائق يطهر سيارته بـ"ديتول" ويضع قائمة تعليمات لركابه
«امسح إيديك بالمطهر اللى عندك، ما ترميش زبالة فى التاكسى، عندك سلة حط فيها»، بعض الضوابط والتعليمات التى وضعها عماد سامى، سائق تاكسى بمنطقة مصر الجديدة، لمن يحالفه الحظ ويركب معه.
من منطلق «الزبون لازم ياخد حقه» يبدأ «عماد» يومه فى الصباح الباكر بتجهيز سيارته الأجرة قبل أن ينطلق فى شوارع مصر الجديدة، حيث يغسل السيارة من الخارج ويعقمها بالمطهرات ويرش مقاعدها بالعطور: «من حق الزبون إنه يركب مواصلة نضيفة ولما يخش العربية يلاقى الحرارة مظبوطة مش لسه هشغله التكييف ولازم يلاقى ريحة العربية حلوة».
حرص الرجل الأربعينى على أرواح زبائنه، يدفعه إلى فحص سيارته مطلع كل أسبوع، للتأكد من أنها سليمة ولا تعرضه هو ومن معه لأخطار، بالإضافة إلى حرصه على تنظيف مقابض الأبواب والمقاعد بمادة مضادة للبكتيريا: «ايدين الزبائن والعرق طول النهار، وده ينزل وده يقعد مكانه خلونى أكون حريص على مقاومة البكتيريا بشكل دورى»، مضيفاً: «أنا مستحيل آكل فى العربية، لما بجوع بركن على جنب آكل وأغسل إيدى وأدخل تانى العربية، ومركب مطهر جنب الدريكسيون علشان الفلوس فيها ميكروبات بعد ما أخدها من الزبون أعقم إيدى والدريكسيون».