محل اسمه «السيسى».. عايز الإخوان يعملوا فيه إيه؟!
محل اسمه «السيسى».. عايز الإخوان يعملوا فيه إيه؟!
لافتة المحل التى تثير غضب الإخوان
مجرد وجود اسم «السيسى» على لافتة فى مدخل محله كان كفيلاً بتعرضه لمضايقات لا آخر لها، صاحب محل ملابس فى العباسية عانى كثيراً من بعد ثورة يونيو بسبب وجود لقب عائلته على المحل والذى تصادف وتشابه مع اسم الرئيس عبدالفتاح السيسى، «المحل من الستينيات اسمه ما اتغيرش ومش هيتغير واللى مش عاجبه يشرب من البحر»، بغضب شديد قالها حسنى السيسى، مؤكداً أن شباب الإخوان المسلمين كثيرا ما اعتدوا على المحل وعلى صاحبه بسبب اسمه: «اللى من المنطقة عارفين إن اسم السيسى ده اسم عيلتى ومكتوب على المحل من سنة 1965، لكن الغريب عن المنطقة بيفتكر إنى مسميه على اسم الريس، وحتى لو مسميه على اسمه إيه المشكلة».
خلال العامين الماضيين، تعرض «حسنى» لمشاكل كثيرة ليس هو فقط بل كل العاملين فى المحل، خاصة خلال المظاهرات التى كان ينظمها شباب الإخوان فى الشوارع: «من ساعة ما المظاهرات وقفت المضايقات خفت شوية لكن برضه مستمرة من بعض الأشخاص المعارضين للسيسى، كل ما حد يلمح اسم المحل وما يعجبوش الاسم يقول كلمة مالهاش لأزمة، وأنا بسكت عشان معملش مشاكل».
رغم ما تعرض له «حسنى» ومحله «السيسى» يصر على ألا يغير الاسم، ليس فقط لأنه لقب عائلته ولكن فرحةً بالصدفة التى جمعته بالرئيس السيسى الذى يحبه ويؤيده: «فخور إن اسم المحل حسنى السيسى، عاجبنى الاسم ومش هغيره، ده اسم أجدادى وأهلى، واسم الرئيس اللى أنقذ مصر من إيد الإخوان، بلدنا فيها حرية شخصية وكل واحد يعمل اللى هو عايزه».