بشم ريحتِك في الورق..
في كتاب قديم من غير غلاف..
وفي ليلة دافية في الشتا..
وصوت كمان..
وفي غنوة حلوة بحبها..
فاجأتني من راديو الجيران..
وبشم ريحتِك في الخريف..
وفي ليل ديسمبر والمطر..
وفي صوت منير..
دايما بتفضل منك إنتي في كل حاجة
حاجات كتير
***
صوتِكْ في ودني مايختفيش..
ضحكِكْ إيقاع كل الحدث..
زي الموسيقى التصويرية ماتنتهيش..
تتكلمي.. يطرح غنا..
يطرح ونس..
يملا الـ"مفيش"..
***
عارف هوايتِكْ تغفري..
وأنا برضه ماعرفش اتقمص..
من غير ما يتنطق الكلام..
بالحرف ممكن يوصلك..
تلوميني بس بدون زعل..
- "من غيري بقى يستحمِلَك"-
مخلوقة من ضلعك صحيح..
لكني بقدر أكملك