الوصفة السحرية للحفاظ ع الهدية
بيتر عبدالمسيح
صباح الخير عزيزى الرجل..
النهارده هنتعلم مع بعض إزاى تخلع من موضوع الهدية ده، مش كده وبس لا ده انت هيجيلك هدية على هديتك الأصلية اللى حبيبتك أصلاً جايبهالك.
الأدوات المستخدمة هنا تليفون أحدث نوع. لا ماتفهمنيش غلط مش هتشتريه مجرد إنك هتأجره من أى واحد صاحبك عنده محل موبايلات، أيوه قول له هأجره منك ساعتين ومش هافتحه أصلاً، ده نمرة واحد.
نمرة اتنين، بارفان رخيص كده استرخص على قد ما تقدر ويا ريت يكون تركيب كده وملوش ماركة أصلاً!
نمرة تلاتة بقى، لف البارفان ده فى علبة معفنة كده ويا ريت لو تاخده فى إيدك والآيفون حطه فى علبة كبيرة شوية واستنضف وحط جنبه ورد وشوية شيكولاته جالاكسى. ماتخافش انت اللى هتاكل الشيكولاته دى فى الآخر، اسمع منى بس.
هتقعد فى مكان حلو انت وهى.
ركز معايا!
هتطلع البارفان التعبان فى إيدك كده وتديهولها. لو أخدته وقبلت الهدية ورضيت بقليلها خير وبركة وده طبعاً مستحيل بالنسبة لأى ست ده حتى كرامتها ماتسمحش يا أخى!
اللى هيحصل أنها هتضايق وتتغير وتبقى مستفزة وهتتعصب غالباً.
فى اللحظة دى هتبص فى الأرض وتوطى صوتك زى اللى مكسور من جواه كده وتقولها الجملتين دول «على فكرة يا حبيبتى.. أنا ولا حبى ولا مقامى ولا اللى بينا يخلى دى هدية مناسبة أديهالك ولا حتى دى الطريقة المناسبة اللى أديهالك بيها. بس أنا عملت كده علشان أعرف أى هدية هتبقى حلوة علشان منى أنا ولا الهدية هتبقى حلوة علشان قيمتها. ودلوقتى بس عرفت الإجابة وبقت واضحة زى الشمس. وعموماً هديتك اللى أنا جايبهالك أهى بس ماظنش ليها لزوم إنى أديهالك دلوقتى لأنى مجروح ولازم أعيد نظر فى اللى بيننا!».
تحفظ الكلمتين دول كويس جداً وأول ما تقولهم تفتح العلبة الغالية اللى جواها ورد وشيكولاته وآيفون 6 وتخليها تبص عليهم كويس وقبل ما تفوق من الصدمة سيبها وامشى وحتى لو ندهت عليك أو حتى شفتها بتقطع شرايينها إوعى تبص وراك.
لا تنسونا من صالح دعائكم وربنا يقدرنا على فعل الخير والثواب!
ملحوظة: كل اللى فى المقال هزار يا بنات.. تحياتى.