أنا كنت إيه.. أنا هبقى إيه؟..
مش عايز أكون غير بس ضيف..
يدخل يوزع ضحكته..
يخرج من العالم خفيف..
***
مش عايز أعيش كده والسلام..
الدنيا فعلا متعبة..
وأنا قلبي الأهبل لسه خام..
كتالوجها بيقول إن أنا..
محتاج أكون بياع كلام..
ياريت لو إنتوا بتشتروا..
تقولولي راحة البال بكام..
مش عايز أكون غير واد خفيف..
يدخل قلوب الناس أوام..
يقدر يسيب للناس كتير..
بسمة عينيه قبل الوداع..
ويسيب على كفوف البشر..
بصمة إيديه وقت السلام..
***
أنا كنت إيه؟ أنا هبقى إيه؟..
مش عايز أكون غير واد جدع..
يضحك أوي..
لو كان على رفوف الحياة..
يضحك إذا..
متشال على كفوف الوجع