أول أيام «الحد من السرعة»: 100 كيلو فى الساعة متوسط السير على «أكتوبر» رغم تحذيرات «الرادار»
إحدى اللافتات التى تحذر من السرعات الزائدة على الطريق
سيارات تتعدى سرعتها الـ100 كيلومتر فى الساعة على كوبرى أكتوبر، لا تعبأ باللافتات المدون عليها «احذر السرعة مراقبة بالرادار»، يفعلون ذلك فى أول يوم لتطبيق حد السرعة القصوى فى عدد من الطرق الرئيسية بالقاهرة والجيزة.
سائقو الميكروباصات: «إحنا عارفين أماكن الرادارات على مستوى القاهرة.. ومحدش بيلتزم بالسرعات المحددة لأنه مفيش عقوبات بتطبق على المخالفين»
«الوطن» قامت بجولة على عدد من الطرق للتعرف على آراء المواطنين فى القرار.
على كوبرى أكتوبر، وفى المسافة المحصورة بين بدايته من شارع البطل أحمد عبدالعزيز فى محافظة الجيزة ومروراً برمسيس وغمرة والعباسية وشارع صلاح سالم حتى طريق النصر فى محافظة القاهرة كانت السيارات تسير بسرعة كبيرة، وأكد عدد من سائقى التاكسى أنهم يعرفون بالضبط أماكن وجود الرادارات على كوبرى أكتوبر ويتجنبون السرعة الزائدة فى هذه الأماكن، بالإضافة إلى أنهم يعلمون أيضاً أماكن الرادارات فى كل الطرق السريعة على مستوى القاهرة الكبرى كلها.
يقول أحمد محمود، أحد سائقى التاكسى: «مفيش أى سواق بيلتزم بالسرعة المقررة على كوبرى أكتوبر إطلاقاً، وعلى فكرة مفيش غير رادار واحد بس موجود على كوبرى أكتوبر وأنا عارف مكانه وكل السواقين عارفين أماكن وجود الرادارات، بالتحديد عند الوصلة المعلقة اللى موجودة فى نص الكوبرى بعد غمرة تقريباً، متعلق فوق يافطة من اليفط الموجودة هناك، بس أنا متأكد إن الرادار ده مش شغال أساساً، لأنه لو شغال كان زمان بيتى وبيوت كل سواقين التاكسى خربت بسبب غرامة السرعة».
ويدلل «محمود» على كلامه بأنه يسير على الكوبرى فى اليوم أكثر من مرة، ولم يأخذ مخالفة على الإطلاق: «أنا بمشى على كوبرى أكتوبر كل يوم مرة أو 2، والسرعة بتوصل فى بعض الأوقات 90، وعمرى ما أخدت مخالفة، لأنى بأروح كل أسبوع أكشف على مخالفات العربية على النت، فما بلاقيش أى مخالفة على كوبرى أكتوبر».
ويتابع «محمود»: «كل السواقين كده برضو، بيروحوا يكشفوا على عربياتهم على النت وما بيلاقوش مخالفات على أكتوبر، اليفط المحطوطة دى مالهاش لازمة أساساً، وبعدين سرعة الـ60 دى بطيئة جداً، ومفيش حد هيلتزم بيها، لأن فيه أوقات كتير الكوبرى بيكون فاضى ومفتوح قدامى فلازم أجرى وساعات السرعة ممكن توصل 90».
أما محمود عبدالمنعم، سائق ميكروباص، فيقول إنه يعمل على خط ميدان عبدالمنعم رياض حتى أول مكرم عبيد فى مدينة نصر، ويقول إنه يعتبر كوبرى أكتوبر بالنسبة له هو خط السير الرسمى: «السرعة على كوبرى أكتوبر مراقبة بالرادار، دى يافطة مكتوبة فى أكتر من مكان، وفيه يفط مكتوب عليها السرعة 60، فى الحقيقة معظم السواقين ما بيلتزموش بالسرعة دى، وبرضو الناس اللى سايقة العربيات الملاكى ما بيلتزموش، بس طبعاً الزحمة الموجودة على الكوبرى بشكل مستمر بتخلى أى حد يلتزم بالسرعة غصب عنه، لكن لو الطريق مفتوح فى أى وقت بنجرى وما بنصدق».
ويتابع «محمود»: «لو التزمت بسرعة الـ60 بلاقى سواقين الملاكى بيجروا جنبى على سرعة الـ100 فبضطر أجرى زيهم، علشان بيفضلوا يعملوا كلاكسات، لكن بهدى السرعة عند المنطقة الموجودة فى نص الكوبرى لأن فيه فعلاً رادار هناك، وبرضو الوصلة دى خطر جداً، فبلتزم بالسرعة غصب عنى».
على طريق محور المشير حسين طنطاوى يوجد عدد من اللافتات مكتوب عليها «السرعة مراقبة بالرادار»، وبالقرب من مسجد المشير طنطاوى يوجد رادار فى اتجاه القاهرة الجديدة، وأيضاً لافتات مكتوب عليها «السرعة 80 كيلومتراً فى الساعة»، وفى نفس الوقت فإن السيارات لم تلتزم بما هو مكتوب على اللافتات، وإنما تعدت سرعتها 100 كيلو. وعلى الطريق الدائرى وأمام أكاديمية الشرطة كانت هناك لافتة مكتوب عليها جميع السرعات المقررة للسيارات، فالسيارات الملاكى سرعتها 90 كيلومتراً فى الساعة، والأوتوبيس 80 والسيارات النقل 70، أما السيارات النقل بمقطورة فسرعتها المقررة لها هى 60 كيلو فى الساعة.
قبل نفق شارع التسعين فى اتجاه المعادى كان هناك رادار، وبعد النفق بنحو 5 كيلو وأمام القطامية هايتس كانت هناك لافتة مكتوب عليها «سرعة جميع السيارات 70»، وبعدها بنحو 3 كيلومترات، وبالتحديد قبل طريق العين السخنة كانت هناك لافتة أخرى مكتوب عليها السرعة 90 كيلومتراً فى الساعة، وأمام برج سما المعادى كان هناك رادار متراكم عليه كميات كبيرة من الأتربة.
أمام نادى القطامية جاردنز فى اتجاه القاهرة الجديدة، كانت هناك لافتة مكتوب عليها «السرعة 90»، وبعد كارفور المعادى وأمام المحكمة الاقتصادية لافتة مكتوب عليها «السرعة 90 كيلومتراً فى الساعة». ويقول عاطف السيد، سائق ميكروباص، يعمل على خط «صقر قريش المعادى - موقف العاشر بمدينة السلام»: إنه لا يتعدى سرعة الـ80 كيلومتراً على الدائرى إطلاقاً، وذلك بسبب أن الميكروباص يعمل بالبنزين، وإذا تعدى سرعة الـ80 سيستهلك الميكروباص بنزيناً أكثر، لذلك هو ملتزم بها».
ويضيف «عاطف»: «جميع السائقين يعلمون بأماكن وجود الرادارات، واللى ما بيعرفش مكانه بنأشر له وبيعرف على طول علشان كده مفيش حد بيتعرض للغرامة، لكن اللى ما عندهمش ضمير هما سواقين الملاكى بيطيروا فى الدنيا والله مفيش حد خالص بيحترم السرعات دى».