زي القضاء والقدر..
زي انتحار شرعي..
بيلهي نفسه في ايه؟..
في ١٠٠ سؤال فرعي..
بيسابق المترو..
وبيمشي على إيده..
وبيحكي عن نفسه..
أساطير ماتتصدقش..
بيجري خلف المستحيل..
علشان يلاقي مبرره.. لما مايتحققش..
زوّق كلامه كتير.. وبرضه ماتزوقش..
هربان من الأسئلة..
هربان من التفكير..
من وحدة أزلية..
بيبرر الوحدة بطريقة طفولية..
"أنا عندي ١٠٠ صاحب..
بس النهاردة مجوش"..
إزاي بتتحول.. كل الحاجات لفاشوش..
من جوه بيت ساكت..
من بره وش بشوش..
ودعوته مفيهاش.. حلم بحياة أحسن..
بيدعي بس لربنا.. يديله قوة الاحتمال..
يديله صبر على البلاء..
لكن مايرفعهوش..
ويقول في كل صلاة
يارب عايز قلب.. مايخافش مـ الزحمة
يارب نفسي في قلب.. يقدر على العشرة..
الليل طويل جدا..
فبياخد الأدوية.. وبيحفظ النشرة..
وبيحفظ الجرنان..
وبرضه يتشائم.. لو برجه قال فرحان..
بيحارب الوحدة ويعاني مـ السرحان..
وإن حب يوم واحدة..
ينفخها في الدخان..
يكره جمود قلبه.. فروحه بتنمّل..
والعمر بيعايره..
معرفش يتجمّل
يضحكله ويسايره..
والقلب يتحمل..
ويعد في خسايره..
أكتر ما بيكمّل..