100 ألف جنيه تبرعات شهرية.. عمرك شفت تكافل كده؟

08:12 م | الجمعة 28 أبريل 2017

فى قرية منشأة البدوى، إحدى القرى التابعة لمدينة المنصورة، قرر مجموعة مكونة من 1000 شاب أن يتخلوا عن صفوف المتفرجين على الأزمة الاقتصادية التى تواجههم منذ فترة، واشتركوا فى مشروع يشبه «الجمعية الموسعة»، بموجبه يدفع كل منهم مبلغاً بسيطاً، ويتم تجميعها فيما بعد، ليكون ربح الجمعية فى حدود الـ100 ألف جنيه يأخذها المحتاج لها شهرياً.

يتم استغلال المبلغ فى تشطيبات مساجد، جهاز عروسة، ومساعدة شاب فى تكاليف زواجه، ونجحت الفكرة بالقرية بشكل غير متوقع فى مساعدة الفئات الأكثر احتياجاً، وبدأ عدد أكبر من الأهالى يشتركون فى المشروع، كما روى أحمد صقر، أحد المشاركين: «محدش هيكره فعل الخير، وبالذات إن المبلغ مش كبير أبداً على حجم الأرباح اللى بتتحقق للشباب، لدرجة إن فيه ناس بقت تستقل قيمة الـ100 جنيه وبتشارك بـ500 جنيه مثلاً».

قرب عائلات أهل القرية من بعضهم البعض ومعرفتهم بأدق أحوال وتفاصيل حياتهم اليومية كان سبباً رئيسياً فى نجاح الفكرة واستمرارها لمدة تجاوزت الـ6 أشهر حتى الآن: «إحنا عندنا لسه محتفظين بمبادئ القرية، كل الناس بتقف جنب بعضها فى الحزن قبل الفرح، لو واحد هناك بيبنى بيته بيلاقى كله واقف جنبه وبيساعده وبيعزم عليه بفلوس، عندنا فى الريف لو واحد زرع بس شوية فول بيوزع منه على القرية كلها». يرى «صقر» أن الشباب بهذه الفكرة استطاعوا محاربة الفقر والتغلب عليه: «نفسى الفكرة شباب كتير فى قرى تانية تنفذها لأنها هتساعدهم كتير».