قال الجنايني للشجر:
أثبت في وش الريح وعافر
إياك تسلم يا صديق..الضعف كافر
الضعف دمع بينفلت من عين مسافر...
بيبل شباكه الحديد
الضعف إيد بتضيع فـ زحمة.. وليل بعيد
الضعف صندوقي الخشب
لم زاره يوم.. ساعي البريد
الضعف طفل بينكسر
تايه في صوته حروف النشيد...
في القلب ماضي
مطعون بخنجر الحنين.. لتراب بلادي
أنا اللي غايب.. فـ الصور فـ العشق ماضي
متهوم وكانت تهمتي.. الغنوه زادي.
شايل هواكي علتي ما كل ضهر
لا حرقت عود أخضر ولا.. لوثت نهر
لا كفرت بيكي وقلت: مش قادر.. لا كفرت.
ولا صابني ضعفي والرحيل ولا انكسرت.
كان روحي زي المراكب وأنت الرياح
كان قلبي مفرود الجناح
عصفور فـ ليلك والمطر
مديت كفوفي.. لوردك العالي.. عباني شوك..
صاب المرار حلقي
وصبحت طير وهواكي.. طلقي
بقعتى روحي.. بالغياب.. ما سمعتي صوتي
كان كل شيء جوايا يصرخ
بلاش تفارقي
غرقني.. دمعي فى الوداع وصابني موتي
سايق عليكي رعشتي وهمى
لمي اللى باقي فى الطرق لمي
أنا روحى زى.. قزاز بيتكسر
مدي ايديكي طبطبي وسمي
ليه تفطميني يا أمي ع الصبار
ليه قلبي "يوسف" فـ الجراح.. وعينيكى يمي