عيال بتجلِد نفسها باللوم
وبنات بتهرب م الحنين فـ النوم
وسنين بتجري زي قطر
وألف سطر بينكتب
وألف كلمة بتنشطب
وكلاب بتنهش فـ الضحية المُنهكة
واتنين بيرموا نفسهم فـ التهلُكة
والحرب .
فـ اللحظة دي ..
الذكريات فوق شاشات العرض
قلب الشوارع بين كفوف الرب
قلب العساكر اتخنق بالرعب
دم الأهالي اتفرط ع الأرض
وانا لسه بسأل ضلي ع الأسفلت
أنا لسه فاكر ولا شكلي نسيت ؟!
أنا برضه ساكت مهما كنت حكيت
واقف مكاني مهما كنت عافرت
فـ اللحظة دي ..
في شمعة جايبة الونس لـ 'شوكان '
والعتمة خايفة م الفلاش فـ عنيه
في باب بيشهد على غلظة السجان
مليون كلابش فـ قلبه قبل إيديه
في جدار بيسند ضهره على كفه
في الليل بيسأل ..
ايه آخرة الأحزان !
فـ اللحظة دي ..
في دوشة جاية من بعيد جواي
حايشة دموعي.. وقلبي مش نساي
حاولت أفلتَر ضحكتك مني
فشلت تاني.. سمعت صوتك ناي.