رفعت وزع وجبات رمضان بمستشفى العباسية: شفت البؤس وقلبي اتقبض

03:43 م | الاثنين 19 يونيو 2017

"مكان يكسوه الظلام، كأنه عنابر بأحد السجون، يحوي بداخله أناسا لا ذنب لهم سوى أنهم مرضى نفسيون، من يدخله ينتابه إحساس بالوجع والقهر، والسوء مما يحاط بالمرضى"، كلمات وصف بها محمد رفعت، ما شعر به عند زيارته مع مجموعة من فرق المتطوعين، مستشفى الأمراض العقلية بالعباسية لتوزيع وجبات الإفطار في شهر رمضان.

اعتاد "رفعت" توزيع الوجبات، في المناطق العشوائية ودور المسنين والأيتام، ولكنه لم يشعر بالاكتئاب إلا عند زيارته لمستشفى العباسية، "شفت حالات كتير بس عمري ما اتأثرت بالشكل ده زي يوم الزيارة دي، كلنا في فرقة المتطوعين جالنا اكتئاب من حال المرضى، وفيه اللي منا مقدرش يستحمل وسابنا ومشي.. وكلنا خارجين مش زي ما دخلنا".

يتصور الناس شكل مستشفى العباسية من خلال فيلم "الفيل الأزرق"، ولكن مشاهد الفيلم كانت ألطف كثيرا من الحقيقة، "لما روحنا مكنش فيه في دماغنا حاجة.. مكان زي أي مكان هنوزع فيه الوجبات بتاعة كل يوم، ولكن من أول ما دخلنا المكان والدنيا شكلها مختلف.. المدخل موحش.. مكان يقبض القلب.. ماشيين ورا بعض ومنتظرين نشوف مرضى نفسيين في الحقيقة وكل اللي في دماغك أكيد زي اللي بيطلعوا في الأفلام، ولكن الواقع أسوأ بكتير".

"المكان عبارة عن عنابر، وكل عنبر فيه سراير أشبه بالسجن حرفياً لدرجة إن النزلاء فيه منهم ليهم لبس موحد.. وأصعب ما في المكان إحساس أبواب السجن اللي بيتقفل عليهم وريحة البول اللي منتشرة في المستشفى كلها وتعامل الموظفين وشكلهم اللي يتعب نفسياً لوحده"، هكذا وصف رفعت ما رآه داخل العنابر بالمستشفى.

عند توزيعه الوجبات، وقف العاملون بالمستشفى أمام الأبواب، رافعين أصواتهم، ملقين كلمة السر "نفحة" ليهجم جميع المرضى على الأبواب لمد أيديهم، لأخذ نصيب من الطعام، ملقين ابتسامة لهم "هذا المنظر أشعرنا بمدى البؤس والدنيا الصعبة اللي هما فيها، بعد أن كانوا يمارسون الحياة العادية، وبسبب أزمة أو صدمة دماغهم راحت وبقى مكتوب عليهم يعيشوا في مكان زي ده بقية حياتهم"، بحسب رفعت.

يدعو رفعت لزيارة العباسية، "المستشفى دي مش زي أي مكان شوفته أو هتشوفه.. الناس دي بتحس على فكرة وبتتبسط بوجودنا وهتفرح بأي حاجة تتعملهم، المكان محتاج الناس تروحله وتعرف النعم اللي إحنا فيها وتشوف جانب تاني من الدنيا"، مختتما كلامه "إحمدوا ربنا على نعمة العقل".