مش كلام
الحكاية
مش كلام
والسلام
كل كلمة
بتتنطق
ليها تأثير
ليها معنى
بنحني لها
احترام
بيستقلوا بالحروف
ويكتموها م الكسوف
كلمة واعية
قادرة إنها
تغير ظروف
كلمة جاية
تبدل الأيام أمان
من بعد خوف
كلمة ليك.. كلمة ليا
تقلب الحلم لحقيقة
وفـ دقيقة
تطلع الشمس الجريئة
تِصَّحى فيك نوم الكهوف
كلمة ضدي أو معايا أو عليا
المهم تكون بفايدة
الحكاية
مش مقايضة
قد تكون شوكة
ومخفية في وردة
توجعك لحظتها
لكن!
خيرها هيبان بعد مدة
شالت الغطا عن عينيك
فَتَحت فبقت تشوف
كلمة تصرخ بس هادية
قلبت الموازين في ثانية
دنيتك مابقتش دنيا
قدمت لك جنتك
في طبق هدية
وضحت لك الأمور
بعد عتمة ليل طويلة
شفت نور
كلمة ناهية لكل زور
وكلمة تانية
بعدها
أنساها
وارمي في البحور
كلمة المعروف
ع الصوابع عدها
هتلاقيها
خمس حروف
كل ده ويرجع يقولك
بس
ده مجرد كلام
دوشة وصداع
والآخر
مفيش التزام
فاضي أنا!
اسمع باهتمام
حكاوي فارغة
تبيع أوهام
اللي إحنا فيه
ده مش عايز كلام
محتاجين أفعال
وتكون تمام
بالذمة طب ده اسمه كلام؟!
فعل إيه ده
اللي هيكون دون كلام
لازم الكلمة تحرك الزمام
كل فعل
ليه رد فعل
لابد
يسبقه
حرف جل
حتما الأفعال
هتيجي م الكلام
المهم
يكون ما بينهم انسجام
كلمتك
ماتروحشي
واد
وفعلك إنت
ماشي عكسي
في المضاد
اوعى تستهتر بكلمة
الكلمة نور من بعد ضلمة
الكلمة سيفك في الحروب
الكلمة عزة من مذلة الهروب
كلمة بتواسي القلوب
كلمة بتفوق شعوب
كلمة سكة في الدروب
كلمة تشرق من غروب
كلمة تحميك من ذنوب
كلمة بتفرج كروب
الكلام ما خلصشي
لحظة!
الأهم مـ الكلمة
اختيارها
واختيار وقت مناسب
لانتظارها
لاجل ما تحقق
أثرها
أما أسلوبك!
فده الشيء
اللي هيحدد مسارها