الأولة معاتيه،
والتانية مشابيه،
والتالتة للحلم..
الأولة معاتيه،
نحيا بعشق البراح..
والتانية مشابيه،
بالضحكة كل صباح..
والتالتة للحلم،
بينور الأرواح..
الأولة معاتيه،
نحيا بعشق البراح
لو مهما ضاق الكون..
وف عز ليلنا نكون
قناديل بننشر نور،
يكشفلنا السكة
"قِبلَة وللتايهين، وكإننا مكة"
وبرغم ده بنتوه،
وبرغم ده بنخاف،
يمكن ساعات نضعف،
رغم القليب شواف
لإننا من طين..
لإننا فانيين..
التانية مشابيه،
بالضحكة كل صباح
وف وش كل الصعب..
يمكن نكون مجانين،
أو طبعنا معَافِر
أو إننا معاندين،
وعنادنا بلا أخِر
"أنا وإنتِ وسط الكون،
اتنين بلا توصيف.."
نرقص كما نجمين،
وسط الفضا بخفة
بِلا صوت بِلا جمهور
هايمين بِلا دَفَّة
وسط السما الملكوت
بندور وبنسافر
"أنا وإنتِ كُنّا إزاي،
والكون بيتنافِر؟"
التالتة للحلم،
بينور الأوراح
وبدون شروط أو قيد..
يزرع أمانينا،
وأمالنا، مد الشوف
يولدنا من خوفنا
من تانى دون الخوف
يصبح طريق مكشوف،
فنمد خطاوينا
"نلقى الونس فيكم،
تلقوا الونس فينا"
وتدور سواقينا..
الأولة معاتيه،
والتانية مشابيه،
والتالتة للحلم،
والرابعة لينا..