باستسمحك
وقت الفراق
ماتجيبش سيرة ماضي كان مبسوط هنا
باستسمحك
واستسمح العمر اللي جاي من عمرنا
يفتح بيبانه
يسيبنا نتنفس وداع في الأمكنة
إنت وانا طريقين
وحان لينا البعاد
والاتجاه رايح وبس
انا وانت عكس
الدنيا "تاكس" بكرسي واحد للجميع
تركب أضيع
أركب تضيع
والكرسي صعب يقضِّي شوقنا وضعفنا
انا وانت كنا انت ف وقت مفيهوش إلا أنا
انا وانت.. ضاعت من سنة
واتبقي أحلامنا سوا ..
بيت القصيد حاسس بغربة بيرتعش
كل أما اشده من جوف الفراق يبكي بصراخ
وحلف عليا ما يكتب الحب لبشر
وحلف عليا مايتكتب عنك وداع!
إزاي تِعَصِّي عليا كل ما أمتلك؟!
مش كنت حتى تسيب لي شِعري يجمّلك
ويلوِّن الدنيا الرديئة فـ وحدتي
مش كنت سيبت مخدتي
عطشانة لدموع ذكرياتنا وجرحنا ..
الليل بيجمع أسلحة
ويصيبني ف الجرح الغميق
وسع السما عمال يضيق
عين السما حلفتلي بعدك تتقهر
وتزلزل الكون بالعياط
ساد السُكات والقلب رافض يهتدي
عمال يدبدب فيا بحنين الاشتياق
كان يحصل إيه وقت الفراق
اتحولك تصبح أنا؟!
كل اما أبص لنفسي أتصبر واكِن
أو كنت أتحول لصوت عاشق غنا
وانشد لحد الفجر واتعذب وائِن
أو كنت أتحول لناي
يعزف غيابك سيموفنية حنينة
أو كنت أتحول حمام
وابعت معايا ١٠٠ رسالة تقرَّبك
شكل القمر حَس بغيابك فـَ اختفى
فبقينا ضلّمة فـِ الحياة
وبقيت يا قلبي ضلّمة من كتر الجفا
واتبدل الليل بالنهار
واتبدل الحب بمرض
المفترض
كل اللي قرر يمشي من نُص الطريق
ياخد عقاب
مثلاً ..
"يحرم عليه قرب البشر
يحرم عليه ضحكة لقا
يحرم عليه حضن اشتياق
يتشد قلبه للسما
وما يشوفوش غير بعد حين
يحرم عليه طعم الحنين
ويكمِّل الجاي من حياته
عايش بذنب اللي اتكسر"
بفكرك ..
ليك باقي حضن نسيته من آخر لقا
وبواقي ريحتك لسه ثابتة
متبتة فـِ إيديا من آخر سلام
وبطمنك..
سرب الحمام
هياخد له جنب من السما ويعدي فيه
عشان مش كل ماتلمحه
تلمح عنيا وهي دايمًا باصَّة ليه
وتفكرك بالحلم بينا إنه انفرط
كل الغلط كان يجي حدَّك يبقي صح
وأنا مش ملاك ولا كنت مريم فـ الهوا
ولا لي جناحات
ولا كنت بعرف يوم أطير غير بين إيديك
ولا كنت بعرف اتبسط
غير لما تاخد همِّي وتشيلني فـ عينيك
وهناك بنجري ف الجمال دون انتباه
فـِ عينيك حياة وعيال وبيت مليان أمان
لكن عشان الحلم دايمًا آخره نصحى محرومين
ضحك النهار على قلبي زقِّني م الخيال فوقعت ونسيت فرحتي
وأهي برضه ذكرى تصبَّرك
لو مرَّه يظهر طيفي جواك فـِ الوداع
باستسمحك
خليك شجاع
وابعتلي آخر ضحكة نسياها فـ عينيك
وابعتلي آخر ضمَّه لإيديا فـ طريق وماتنتظرش ابعت لقلبك أي شيء
كل اللي سيبته فـ قلبي أنا بس أملكه
هقفل عليه بجراحي واتوجَّع سكوت
وان حد لاحظ جرحي هكدب لو بموت
وهقول نصيب وهقول قدر
الذكريات بينَّا انتهت
وأنا قلبي بكره هيتجَبَر