شريف حسين شريف حسين باب السحر
الأحد 03-12-2017 | PM 05:35

شريف حسين، من مواليد القاهرة في 1996، وهو شاعر وقاص، يمارس العمل الصحفي بعدد من الصحف الكبرى، يدرس الإعلام ويكتب المقالات بعدد من المواقع المصرية والعربية، وصدرت له مجموعة قصصية بعنوان "برواز لصورة زفاف"، عن دار "المصري".

يا عيون تناديني لباب السحر..

ويا ضحكة تاخدني من الدنيا..

دي حورية دي ولا عروسة بحر..

سحبتني معاها في كام ثانية..

فأشبه للعيّل لو يفرح..

أنا إمتى بدأت أتوه واسرح..

لحظات النشوة المتعاشة..

سوكسيه لممثل على مسرح..

ينفش ريشه.. ويحس كأن في إيده الكون..

وبيرقص قلبه مع التصقيف..

وأنا قلبي بيرقص زيه تمام..

مش طايق رجلي تكون ع الأرض..

أنا بدعي ما ننزل مـ الخشبة..

ولا يقطع حبي نهاية العرض..

*

مش عارف إزاي..

في حاجات أكبر بكتير م الوصف..

وبتفشل تنقل إحساسها..

لو جيت تحكيها لناس تانيين..

في حاجات مفيهاش ولا ليه ولا مين..

الكيميا ما بين البني آدمين..

أو رقص القلب ما بين ضلعين..

أول ما يشوفك من على بُعد..

لحظة ما بتيجي العين في العين..

*

يا مزيّنة في عيوني العالم..

مالياه بالحركة وبالألوان..

مليان أحاسيس مش مفهومة..

وبغازلك علشان بستنى..

تعابير الوش المصدومة..

الضحكة الحلوة المرسومة..

يا شعور الراحة اللي في وشك..

زي حضن اتنين بعد خصومة..

أو رد حقوق ناس مظلومة..

أو طعم اللقمة المقسومة..

بين الحبيبين..

يا عيون تناديني لباب السحر..

ويا سحر بيخطف نن العين..

قصائد متعلقة

تعليقات الفيس بوك

القصائد الأكثر مشاهدة

عاجل