10 موظفين يجب رفدهم من العمل.. "هل أنت منهم؟"
دائما ما يشعر الموظف بقلق ويخشى أن ترفده المؤسسة التي يعمل بها، لكن هناك بعض الموظفين يستحقون ذلك سواء بسبب عدم تقديم الفائدة أو تجاوز السياسات الخاصة بالشركة ما يجعل الشركات يسعون للتخلص منهم.
ويقدم مصطفى خليفة 10 أنواع للموظفين الذين لا بد رفدهم حتى لا تكون منهم كما يلي:
1- الموظف الذي يخترق سياسات الشركة:
كل مؤسسة لها سياستها وإجراءتها لذلك أي تجاوز أو خرق للسياسات دي بيعرض الموظف للفصل، طبعا مش كل السياسات تجاوزها بيتسبب في الرفد لكن سياسات الملكية الفكرية وحماية المعلومات خصوصا عن المنافسين والتفرقة أو العنصرية من أهم السياسات اللي بتتسبب في الرفد.
2- الموظف الذي لا يعتمد عليه:
الموظف اللي دايما مبيسلمش شغله في الوقت المتفق عليه بشكل مستمر وبيتسبب في مشاكل للمديرين وللشركات، طبعا مش كل التأخير بيتسبب في الرفد، بس أكيد لو دايما بتتأخر في تسليم شغلك ده هيتسبب في رفدك.
3- الموظف المتمرد:
اللي دايما بيحاول يخرب في الشركة من خلال الكلام مع الزملاء الأخرين عن عيوب في الشركة ويحفزهم أنهم يعترضوا أو يعملوا مشكلة.
4- الموظف غير الكفء بشكل واضح:
طبعا هنا مش بنتكلم عن الناس اللي مهاراتها ضعيفة دول ممكن يتعملهم برامج لتحسين مهاراتهم وتدريبهم، لكن في ناس فعلا مهاراتهم بعيدة تماما عن وظيفتهم وبتخليهم غير قادرين على فهم حتى أساسيات الأعمال المطلوبة منهم.
5- الموظف دائم الغياب بشكل متكرر وغريب:
وده بيأثر على قدرة المدير على الاعتماد على الموظف، لأنه مش قادر يوكل إليه مهام لأنه دايما بيغيب وبدون سابق إنذار وكل مرة بعذر مختلف.
6. الموظف الذي يحصل على جزاءات متعددة:
دايما له عداوات مع معظم الناس ودايما بيجادل في أي موضوع وأوقات دون أسباب منطقية، ممكن تكون دايما بتحاول تطلع أفضل ما عند الناس من خلال النقاش لكن مش عن طريق الجدال وخلق عداوات مع الناس.
7- الموظف العنيد:
وده الموظف اللي بيبقى صعب في التعامل معاه، لازم ياخد وقت طويل لحد ما يقتنع أو يبتدي في المهمة المطلوبة منه، ونشيل هم أننا نطلب منه حاجة أو نقنعه بحاجة، ده أكيد مش من النوع المفضل عند المديرين.
8- الموظف المتذمر:
الموظف دائم الشكوى سواء من طبيعة الشغل أو الشركة أو المرتب، في أي نقاش أو موضوع لازم يشتكي من أحواله وأحوال الشركة والظروف المحيطة، ده بينشر طاقة سلبية في المكان أو الفريق اللي بيشتغل معاه والمديرين بيحاولوا يتجنبوا أنهم يضموه لإدارتهم حتى لو كانوا متميزين عمليا أو في مهاراتهم.
9- الموظف الثرثار:
الحكاي اللي بيحب القيل والقال ودايما بيتكلم مع زملائه عن زملائه، وده بيبقى عامل مهم لنشر الشائعات في الشركة أو زيادة المشاكل بين الناس.
10- الموظف الذي لا يتحمل نتيجة أخطاءه:
الموظف اللي دايما بينكر مسؤولية أخطاءه أو أفعاله، وأوقات يلوم زملاءه على أخطاءه، دايما المديرين بيحبوا اللي بيعترف بخطأه عشان يتجنب تكراره ويتعلم منه، لكن عدم الاعتراف بالخطأ هيخلي الموظف يكرر نفس أخطاءه.
وأخيرا أوصى خليفة، بتجنب هذه العادات، لضمان النجاح في الوظيفة.
تعليقات الفيسبوك