اعمل الصح.. الجملة الشهيرة بتاعة غسان مطر.. يعنى اللى هو إيه يعنى؟
يعنى اللى تبقى عايزه قوى جداً بس عارف إنه مش من حقك فتسيبه.. يعنى إنك ما تبصش فى طبق غيرك.. يعنى تسمع كده للصوت اللى جواك وبيكلمك وإنت عشان هتموت على الحاجة وعينك طالعة عليها بتقعد تلاقي لها مبررات عشان تقنع نفسك إنها من حقك.. غلط.. اسمع الصوت مش تسكته.. يعنى تقول اللى بيقولهولك الصوت الصح اللى جواك بصوت عالى لنفسك أولاً.. ده هيكلفك وهيتعبك.. بس عيش تعبان شوية بضمير مرتاح ولا تعيش تعبان جداً بضمير بينغز عليك.