ليه كل الخلق
ف-أيام الحَجّاج كرهوه!
وأدانوا وشجبوا وكتبوا
عن الحَجّاج أسفار!
كام واحد فيهم
قتل الكل بقتل أخوه!
دخّل نفسه الجنة
ورمى الحَجّاج ف-النار!
كام واحد إدّى لنفسه الحق
ف-فهم الدين!
ورمى الملايين بالجهل وقال
دول ناس كُفّار!
كام حد حقيقي وكان مهتم
إنه يسيطر من غير الدم!
نفترض إن المفروط متلم
كان يعني هيبقى ف-يوم جزّار!
مش كان هيشوف ف-عيونهم شئ
عكس اللي شافوه!
ليه كل الخلق
ف-أيام الحَجّاج كرهوه!
هذا الحَجّاج بيخاف م-الله
وتملّي يحب اللي بيخشاه
حازم جدًا ما فرقش معاه
ولا لون ولا جنس ولا ديانة..
وإكمنُه شديد سموه قاتل
رغم إنه عشانهم بيقاتل
ودليل على إنه كمان عادل
كانت كل الناس تعبانة..
واحدة إتجادلت وياه م-الشعب
ردّها خلاه يسرح ويتوه..
بني آدم عادي ده شئ مش صعب
لكن قدرُه إن الناس كرهوه..
عند الحَجّاج ١٠٠ ألف دليل
على إنه برئ وجميل ونبيل
يا سعادة القاضي ده حظه قليل
وأهو ده اللي رماه ف-الزنزانة..
أنا بأطلب منك تتكرّم
تديله براءة ده مش مجرم
وعلاقته مع الناس تتحرّم
وكفاية مَذلة ومهانة..
ألفين مبروك وتلاتة كمان
خرج الحَجّاج وكتير حيُّوه..
وكتير إترحّم على أيام
عصر الحَجّاج بعد اللي عاشوه..
معلش معايا مكالمة أوام
هأنجزها وهأرجع .. أيوا ألووو..
مستر حَجّاج أنا خدت الشيك
بأتفسّح راكب تليفريك
بأدعي لك روح ربنا يشفيك
ويرجّع ليك كل اللي خدوه..
أنا عايز أقولك بَحّ خلاص
أصبحت زعيم برلنت وماس
بكرة هتلمس ف-قلوب الناس
فين الحَجّاج وإزاي كرهوه!