قد الكف.. ويطبخ 100 صنف

09:33 م | الأحد 18 فبراير 2018

لا يشغله اللعب مع الأصدقاء والجيران، ولا يمارس رياضة معينة، إنما يشغل معظم وقته بإعداد وصفات الأكل المختلفة الشرقية والغربية، الحلو منها والحادق حتى أصبح أصغر شيف. سامى مصطفى، 11 عاماً، هو ابن مدينة مغاغة بمحافظة المنيا، تعلّم إعداد الطعام من والده وعمه، حتى تفوق عليهما، وأصبح يُطلب خصيصاً فى الأفراح والمناسبات العائلية التى تقام داخل المحافظة.

يجمع «سامى» بين دراسته وبين عمله كشيف: «لما بيكون عندى فرح بعمل الحلويات من بالليل على حسب طلباتهم، وأصحى قبل الفجر أجهّز الأكل وأسوّيه، ولما أرجع من المدرسة بذاكر شوية وقبل ما أروح الفرح اللى عندى بطلّع الأكل أسخّنه ويروح سخن». لا يملك وقت فراغ للعب مع أصدقائه: «لما بيكون عندى وقت فاضى بدخل على النت أعرف طريقة أكل جديدة أو مش مصرية، وأتعلم طرق جديدة أدوق بيها الأكل عشان التقديم، يعنى بحاول كمان إنى أتفوق على والدى وعمى اللى بيشتغلوا بطريقة تقليدية».

يعمل «سامى» فى إحدى الشركات المسئولة عن تنظيم الأفراح وإعداد الطعام: «كل اللى معايا فى الشركة ناس كبار، عمرهم ما استقلوا بيا ولا بخبرتى، كلنا بنساعد بعض، أنا بسألهم وهمّا بيسألونى»، على الرغم من أنه يداوم على دراسته، فإنه لا يرغب فى الحصول على مؤهل عالٍ، معتمداً على احترافه مهنة الطبخ: «الكلية دى مش فى دماغى طالما بقرأ وبكتب ومعايا صنعتى»، ويعتبر هو المسئول عن الطعام اليومى لأسرته: «ماما بتعتمد عليا فى الأكل، خصوصاً إن أكلى مختلف، ودى حاجة بتبسطنى».