أهالى عقار منشأة ناصر المنهار فى الشارع لليوم العاشر على التوالى

07:01 م | السبت 03 مارس 2018

لليوم العاشر على التوالى، افترش سكان العقار المنهار بحى منشأة ناصر الشارع، بعد أن سقط منزلهم، مساء الخميس قبل الماضى. وقالت «نجاح فاضل»، 55 سنة، واحدة من المتضررين من سقوط المبنى: «ما استلمناش ولا شقة ولا فلوس من يوم ما البيت وقع، وودونا عند الساحة القديمة اللى فى مركز شباب منشية ناصر، وقعّدونا فى البدروم»، مشيرة إلى أن البدروم لم يكن مناسباً لهم، معبّرة عن غضبها: «ماكانش فيه ميّه، ولا صرف صحى، وكمان السقف شكله يخوف.. ماكانش فيه غير 4 مراتب سفنج، والبطاطين كل 3 يتغطوا بواحدة»، الأمر الذى دفع الأهالى إلى مغادرة المركز، حسب «نجاح»، وعادوا إلى الشارع: «إحنا تعبنا، وعيال بنتى الصغيرين بيموتوا، ده يرضى مين؟».

وتقول «لوزة سعيد»، 32 سنة، واحدة من سكان عقار رقم 4، المجاور للمنزل المنهار، إنها تقيم فى الشارع منذ انهيار العقار بعد أن منعها المسئولون من العودة إلى المنزل، خوفاً من انهياره: «عشنا 4 أيام سودا.. ولسه هنشوف تانى». وأضافت «لوزة»: «مفيش حد سأل علينا غير جمعية خيرية، هى اللى جاتلنا مرة واحدة ومشيت». ويقول محمد سالم، 36 سنة، أحد سكان شارع حنفية المجاور للمنزل المنهار: «أنا نزلت أستلم البطاطين والمراتب والفلوس اللى الحكومة قالت عليها الساعة 2 بالليل يوم ما الحادثة حصلت، بس أخدوها ودوها مركز الشباب، ورفضوا أن الأهالى تاخدها»، مشيراً إلى أن وزارة التضامن ذكرت فى أحد الأخبار أنها صرفت نقوداً للأهالى: «بيقولوا بيصرفوا لينا فلوس كل يوم، والكلام ده ماحصلش ومحدش سأل علينا».