في 8 مارس عيد مرأة، و21 مارس عيد أم، و16 مارس عيد مرأة مصرية.. مؤامرة شهر مارس زادت عن حدها، المرأة بشكل عام أثرت فيا.
سعاد أحمد (أم حميدة فى فيلم ابن حميدو)
علمتني إن الراجل ده بسكوتة قابلة للكسر في أي وقت، من إيد حاطة مونيكير أو إيد ريحتها توم، مجرد بس إنها تزعق وتقول "حنفي!!" يتغير كلام وموقف آدم لصالح حواء.
عبلة كامل
علمتني إن الست مهما ضحكت هتعيط لك وتلطم لك قد ما ضحكت لك مرتين تلاتة، علمتني إن الكشري المظبوط بيتعمل من الست "كشري البت فاطنة".. النكد هو الوسيلة المهمة للمرأة عشان تهيمن على الراجل وتسيطر عليه أو عشان تخلع منه.
هند رستم (هنومة فى فيلم باب الحديد)
حقيقي كانت من أجمل الستات اللي شوفتهم في حياتي.. هي دي المرأة في كل حاجة، نفس المرأة دي فهمتني إنها روح شريرة تسكن جسد سيدة جميلة هتوقع قناوي في حبها، وفي نفس الوقت ترفض حب قناوي ليها، قناوي كان مجنون بيها بس في الآخر خلت قناوي مجنون في المستشفى.
سناء يونس (فوزية في مسرحية سك على بناتك)
"مسك إيدي قال إيه بيعديني".. "يا حنفي يا ابن المبقعة".. الإفيهات دي مش للضحك.. فوزية وضحت لي قد إيه هي كانت غبية في حبها وحنفي مستحمل، بتحبه وتشتمه وقت ما تحب، الغباء في الحب حاجة لذيذة بس غباء الست كفيل إنه يدمر دولة كاملة، يقوم حروب وصراعات، المرأة طبعا عندها الجرأة إنها تحرج وتهين الراجل فيسيبها ونرجع لأول سبب عشان غبية.
عائشة الكيلاني (الست شربات في فيلم الشيطانة التي أحبتني)
طيبة ودمها خفيف بس دماغها مفوتة.. الست شربات ماتكلمهاش وهي بتعذب الشغالة، وهي بتقطع التوم، وهي بتنضف الحمام، وهي بتتفرج على التلفزيون، وهي قاعدة على الكرسي، وهي بتبص لك.. بص ماتكلمهاش أصلا هي كده يا سيدي منقرفة من اللى حواليها بما فيهم إنت.. النوع ده من المرأة بدأوا يوظفوها في الحكومة من التسعينات.
وأخيرا أمنا الغولة
ليه أمنا الغولة مش أبونا الغول؟ عشان أكيد مش عنده موهبة الخداع اللى بتستخدمها ضد الفريسة بتاعتها.. عشان أكيد مش عنده موهبة التخفي وإخفاء الفريسة.. عشان أكيد هو الفريسة.
لو انت خلاص اتعودت على السجاير وجسمك اتعود عليها وجيت تبطل هتتعب وتتعصب وتتوتر بس بعد كده هترتاح نفسيا.. هي كده المرأة.. اتعودنا عليها.. لو بطلنا المرأة ممكن تقوم حروب بس بعد كده هيبقى فى سلام دائم.