احذر الوقوع في هذه الأخطاء عند افتتاح شركة جديدة

04:00 م | الأحد 03 يونيو 2018

تقع الكثير من الشركات الناشئة في أخطاء تجعلهم يتأخرون عن تحسين مستواها والوصول إلى مكانة كبيرة وأحيانا تؤدي إلى غلقها، وغالبا يحدث ذلك لقلة خبرات المؤسسين.

ويٌقدم مصطفى خليفة استشاري تطوير الأعمال الأخطاء التي تقع بها الشركات الناشئة من أجل تفاديها، كما يلي:

1. الشركة لها مؤسس واحد فقط

ممكن يكون المؤسس ده شاطر جدا، ولكن دايما الشركات الناشئة اللي بيأسسها فرد لواحده بتبقى فرصها أنها تكمل أقل بكتير لأنه مبيقدرش يغطي كل النواحي وخصوصا في المراحل الأولى.

2. الشريحة المستهدفة صغيرة جدا

منتج الشركة أو خدماتها بتستهدف شريحة صغيره جدا، وده بيصعب عملية البيع طبعا في أوقات ده بيبقى مقصود بس محتاج دراسة جيدة جدا واختيار صحيح لقنوات الوصول للشريحة المستهدفة.

3. فكرة المنتج أو الخدمة ضعيفة وغير مبتكرة

لأنه من المهم جدا يبقى المنتج أو الخدمة بيحلوا مشكلة للعملاء، وبالتالي لازم تكون الفكرة قويه وفعلا بتغطي احتياج عند العملاء.

4. تعيين موظفين غير أكفاء

لأن في الأخر أي شركة بتقوم على مواردها البشرية، وبالتالي مستوى الموظفين بيحدد مستوى الشركة ومستوى المنتج والخدمة اللي بتقدمهم.

5. طرح المنتج في السوق بدري أوي أو متأخر أوي

لو المنتج لسه مخلصش بشكل فني مقبول يبقى من المهم عدم طرحه، لأن بالشكل ده هياخد سمعه معينة هترتبط بيه مهما الوقت عدا، ولو متأخر أوي ممكن يكون فيه منافسين سبقوه وبالتالي هيخسر جزء كبير من الفرصة اللي كانت متاحة.

6. الحصول على تمويل قليل أوي أو كتير أوي

لو التمويل اللي حصلت عليه الشركة الناشئة قليل هيتسبب في تحديد الاختيارات اللي قدام المؤسسين وبالتالي هيعمل عليهم ضغط واللي ممكن يتسبب في تقديم تضحيات هما مش عايزنها، ولو كتير اوي هيبقى عبء عليهم وممكن يخلي المستثمر يرفع سقف توقعاته ويبقى قلقان اكتر.

7. عدم إدارة المستثمرين بشكل صحيح

من المهم جدا نقضي وقت مع المستثمرين ويكون فيه شفافية في توضيح الخطة الزمنية والتقدم في الخطة، لازم نشاركهم في المشاكل اللي بنواجهها ودايما ناخد رأيهم في القرارات خصوصا القرارات المهمة.

8. التضحيه بالعملاء لتحقيق ربح سريع

وده بيحصل بسبب وجود ضغط سواء بقلة التمويل أو بسبب رفع سقف توقعات المستثمرين أو طرح المنتج متأخر، وده بيخلي التركيز كله إزاي نحقق مبيعات بسرعة بغض النظر عن جودة تجربة العملاء مع منتجنا، وده طبعا بيقتل أي نمو مستقبلي لأنه بيأثر على السمعة.

9. عدم رغبة المؤسسين في الدخول في التفاصيل

وده بيأثر لأنه بيخلي المؤسسين سطحيين جدا ومعندهمش تفاصيل الشغل اللي بيعملوه، وطبعا ده بيخلي قرارهم مش بايدهم وأوقات لو الشخص اللي معتمدين عليه مشي يبتدوا من الأول.

10. حدوث خلاف بين المؤسسين

وده طبعا من الحاجات المؤثرة جدا، لأن عدم وجود توافق هيأثر على روح الفريق ويمكن يتسبب أن الشركة تقفل.

11. عدم وجود تركيز من المؤسسين

أوقات مؤسسين الشركات بيبتدوا الشركات الناشئه وهما مش مدركين صعوبة الموضوع، فمع أول مشكلة بيرتب أولوياته بعيدا عن الشركة، وبالتالي بيفقد تركيزه واهتمامه بيها، وأوقات بيبقى غصب عنه لأن التمويل قليل وهو محتاج يغطي مصاريفه الشخصية، وبالتالي بيبتدي يدور على شغل جنب شركته.

12. العند وعدم اخذ استشارة

من المهم جدا استشارة الناس اللي حواليا وأصحاب الخبرات في المجالات المختلفة، لأن ده مش بس بيوفر وقت، كمان بيجنبنا نقع في أخطاء اللي قبلنا غلطوها، وبالتالي عدم العند وتقبل النصيحة وكمان محاولة الحصول على نصائح من الحاجات اللي بتنجحح الشركات الناشئة.