- ابن وقته: بالعكس أنا شايف كوبر مدرب عشرة على عشرة.
- طارق: دا مدرب فكسان.. تقدر تقول لى ما نزلش صلاح ليه؟
- ابن وقته: علىّ النعمة انت اللى خيبان ما دريان.. صلاح إيه.. انت فاكر صلاح بيلعب لوحده.
- طارق: هو الوحيد اللى بيعرف يجيب اجوان.. والباقى فانلات!.
- ابن وقته: تعالى شوفى ابنك يا منى (وهو ينظر إليها): أنا مش عارف انت وارث الغبا دا عن مين؟!.
- طارق (وهو ينظر إليه وإلى أمه): مش عارف بصراحة.. بقول لكم إيه أنا فاكك.. هروح أقابل أصحابى.. سلام.
- ابن وقته: عيل رخيص.. ما انت لو كنت فالح كنت طلعت لعيب كورة.. كان زمانك دلوقتى بالشىء الفلانى.
- منى: سيبه ينزل وارحمنى م الصداع.
- ابن وقته: الواد عليه عفريت اسمه صلاح.. طول ما بيتفرج ع الماتش.. ليه ما نزلش صلاح؟.. ليه ما نزلش صلاح؟!.
- منى: عنده حق.. صلاح هو اللى بيعرف يجيب اجوان.. صحيح الفريق كان ليه منظر.. بس فى الآخر اتغلب.
- ابن وقته: وتريزيجيه؟!.. تصدقى بالله.. الواد ده لو خد فرصة يبقى أجدع من صلاح!.
- منى: فرصة إيه.. ما هو بيلعب على طول.. صحيح بيلعب حلو.. بس مش زى صلاح خالص.. كل الناس بتقول كده.
- ابن وقته: انتى هتعومى على عوم الشعب الواطى دا.. كل مواطن عامل نفسه مدرب.. المفروض كوبر يسحب دا وينزل دا.. والمفروض كان ياخد معاه فلان وعلان.. ولأ ترتان أحسن مش عارف من مين.. ما تسيبوا الراجل يشوف شغله.
- منى: هى الكورة معمولة ليه.. مش عشان الفرجة.. أى حد بيتفرج لازم يفتى.
- ابن وقته: بس يكون فاهم فى اللى بيتكلم فيه.
- منى (ساخرة): زيك كده؟.
- ابن وقته: طبعاً.. يا منى أنا بشوف كورة من أيام الخطيب.. انتى فاكرانى قليل.. كوبر ده هو أكتر واحد فاهم قدرات اللعيبة.. وبيطبق معاهم النظرية الصح!.
- منى: نظرية إيه؟!.
- ابن وقته: نظرية حيطة يا وِلد.. بيرص اللعيبة كلهم ورا، وهات يا دفاع.. الانسحاب تكتيك معروف فى الحرب.. مشكلتكم إنكم مش فاهمين.
- منى: جايز.. بس كده عمرنا ما هنجيب اجوان.. وكمان اللى بيدافع مصيره يتعب.. وييجى فيه جون زى ما حصل مع أوروجواى.
- ابن وقته: بس عقدناهم.. عملنا للمدرب بتاعهم بارومة فى دماغه.
- منى: أنا شايفة إن صلاح لازم يلعب.
- ابن وقته: تانى صلاح؟!.. انت هتعملى زى ابنك.. وقال بتشتكوا.. قال إيه مفيش ديمقراطية.. وانتوا دماغكم كلها فى واحد مفيش غيره.. اتعلموا تبقوا مشركين.
- منى: أستغفر الله العظيم.
- ابن وقته: ها.. أنا ماقصدش اللى فى بالك.. أنا قصدى تتعلموا الديمقراطية.. وتتوبوا عن عبادة الفرد يا شعب واطى.
- منى: طيب بالمناسبة السعيدة دى أنا والولاد اتفقنا إن السفرة خلاص اتخلعت ولازم نشترى سفرة جديدة.
- ابن وقته: وانتى تعرفى تعوضى السفرة دى؟.. دى تتصلح وتتلمع وتتشروز تبقى آخر حلاوة.
- منى: بقول لك إيه؟.. انت لسه بتتكلم عن الديمقراطية.. خلاص إحنا أغلبية وانت واحد مفيش غيرك!.
- ابن وقته (ساخراً): على بابا.. على فكرة محمد صلاح دا مفيش زيه.. وكوبر بطيخة.. وفريقنا بطاطس.
- منى: أوام رجعت فى كلامك.
- ابن وقته: ما انتوا لعبتوها بخطة «حيطة يا وِلد»!.