إهداء لروح الشاعر مجدي عبد الرحيم
طول عمره
بيرمح ورا موته
نفسه يطوله
بيكتب..
ف قصايد حزنه
ويضحك من قلبه
ف وشوش الكل
قاعد يحكي لي
عن أمه
وميت عقبة
والنادي الأهلي
وأول يوم مدرسة
وحكاية العجلة المكسورة
وطلوعه الهرم
هو وصاحبه
لجل يشوف الدنيا
من فوق
قالها مرة
وهو بيضحك
ع القهوة
عارف إنك واحد
من اللي هيمشوا..
ف جنازتي
شافني متاخد
طبطب على كتفي
وقال أوعى تنسى
تدعي لي
وتقرا على روحي ..
الفاتحة
لما دخلت الأوضة
أبص عليه أخر بصة
كنت متأكد
إنه هيخدني بالحضن
زي ما كان متعود
لكن معملهاش
يمكن علشان
نسيت أدعي له
وأقرا له الفاتحة