يعلم هانى فارس، صاحب مطعم لبيع الكريب بمنطقة كوبرى الخشب بالدقى، عشق الناس لكرة القدم، ومتابعتهم للمباريات بشغف شديد، وحبهم لنجوم الكرة، من محمد صلاح النجم المصرى هداف الدورى الإنجليزى، إلى ليونيل ميسى وكريستيانو رونالدو، فقرر عمل أكلات من الكريب بأسماء اللاعبين العالميين الثلاثة، ليقيس مدى حب الناس لهم تبعاً للطلبات: «اللى ييجى يقولى عايز كريب صلاح، أو أى حاجة بس تكون تبع رونالدو، أو حاجة حلوة كده من بتاعة ميسى».
كريب «صلاح» هو الأعلى سعراً حيث يباع بـ35 جنيهاً للواحد، أما «رونالدو» فيتساوى مع «ميسى»، الواحد منهما 30 جنيهاً: «فى الأول قلت هخلى الـ3 بنفس السعر، لكن كمصرى وعايز صلاح الأفضل قلت أخليه منافس لهم، وأنا عارف ومتأكد إن الناس هتختار أى أكل باسم محمد صلاح عشان هما بيعشقوا الراجل ده».
على الرغم من أن كريب «صلاح» هو الأعلى ثمناً، إلا أنه الأكثر مبيعاً. لاحظ «هانى» أن الصورة تفرق كثيراً فى العملية التسويقية، فالزبائن ينظرون إلى صورة اللاعب، قبل رؤيتهم لأنواع الكريب المكتوبة تحت كل منهم: «لما لقيت كده، رُحت عامل اختبار، وعملت كريب صلاح من أفضل المكونات عندى، ركزنا عليه أكتر بعد شراء الناس كريب صلاح، وعملنا له أفضل توليفة».
الأكثر مبيعاً بعد «صلاح» هو كريب «رونالدو»: «اكتشفت أن اللى بيحبوا رونالدو أكتر من ميسى، مع أن بالنسبة للأكل كريب ميسى طعمه أحلى».
تعليقات الفيسبوك