ديكور من كراكيب البيت يقلل التكلفة من 60 ألف جنيه إلى ألفين فقط
ديكورات من كراكيب البيت
المشهد يبدو أقرب إلى لوحة فنية ساحرة تجذب نظر المارة، ولا يترددون للحظة واحدة فى زيارة جاليرى الهدايا الخاص الذى افتتحه أحمد المشد، 24 عاماً. ما يلفت الانتباه هو قيام الشاب العشرينى بتلوين الجدران وتصميم أفضل الديكورات باستخدام خامات وأدوات قديمة خاصة به وبأصدقائه، من أجل تقليل النفقات المادية وهو فى بداية مشروعه.
قام «أحمد» بتعليق المُلل بطريقة منظمة على الجدران، ويتراص إلى جانبها ألواح من الشبابيك الخشب ذات الألوان المبهجة: «لما أجرت المحل جبت مهندس ديكور عشان يشطب لى الواجهة بتاعت المحل، قال لى محتاج 60 ألف جنيه، طبعاً أنا مش معايا وكل فلوسى يا دوب حطيتها فى الإيجار، فعملت كل حاجة بنفسى، لميت مُلل البيت القديمة ومن عند اصحابى وخدت شبابيك ودهنتها ورصيتهم بشكل مختلف».
برع «أحمد» فى رسم ديكور مختلف يميزه عن غيره، وباستخدام أدوات بسيطة جداً كلفته 2000 جنيه: «الحيطان على المحارة زى ما هى، رشينا لون بس وبعدين حطينا المُلل وألواح الخشب ورسمت على الحيطان نفسها، وأكتر حاجة تخلى المكان مبهج هى الألوان، وده اللى خلى المكان مختلف فعلاً».
استخدم دراجته التى كان يلعب بها فى صغره، وغلفها بالألوان من كل الاتجاهات، ثم علقها على واجهة المحل، وهى من الأشياء التى كان لها منظر مختلف وجاذب لانتباه المارة، واستطاع أن يفتتح الجاليرى منذ أشهر قليلة: «من زمان وأنا بأحلم يكون لى مشروع خاص، وقعدت أحوّش فلوسه من أى شغل أشتغله، وأُحبطت شوية لما عرفت إن تكلفة تشطيبه غالية، بس ماوقفتش وعملتها بنفسى، ومن ساعتها والناس مبسوطة بالشكل الجديد».