حب إيه اللى انت جاى تقول عليه؟!

07:36 م | الأربعاء 13 فبراير 2019

فرحة عارمة كانت تملأ قلب ياسمين إسماعيل، عندما كان زوجها يفاجئها بالهدايا والخروجات احتفالاً بعيد الحب طوال فترة الخطوبة، التى لم تدُم أكثر من عام حتى تزوجا، وانشغلت حياتهما بين المسئوليات ومصاريف الأولاد، كحال أغلب الأزواج فى مصر ودول مختلفة.

«كان بيجيب لى لبس ودهب وقت الخطوبة»، تقولها «ياسمين» بأسى، التى كانت تتمنى أن يستمر احتفالها بعيد الحب بعد زواجها، بدلاً من اللامبالاة تجاه المناسبات، نتيجة انشغالها بأعمال المنزل ودروس الأبناء بالمراحل التعليمية المختلفة، ولم تتذكر «الفالنتين» هذا العام إلا من خلال صفحتها على «فيس بوك» وتعليقات الناشطين عليه: «تقريباً جوزى نسى عيد الحب يوم إيه، شغل البيت والعيال مش مخلى الواحد يركز فى التواريخ، والوفاء بمصاريف واحتياجات البيت أهم من الهدايا بكتير، فرحتنا بجد لما نجيب للولاد اللى محتاجينه».

{long_qoute_1}

كانت إيمان حسن تهتم كثيراً بالمناسبات والهدايا وقت خطبتها منذ عامين، قبل تخرجها فى الجامعة، لما لها من أثر طيب فى النفوس، وتترك ذكريات رومانسية بين الطرفين لا تمحى من الذاكرة، ليتغير الأمر بعد الزواج، فأصبح احتفالها يقتصر على الأعياد الرسمية دون غيرها، وتكون هديتها الحصول على مبلغ مادى من زوجها: «هو العيد الكبير والصغير، لا عيد حب ولا غيره، وباخد من جوزى فلوس وبشترى اللى عايزاه، وممكن نحتفل لو جد جديد فى حياتنا، زى مناسبة خاصة أو ترقية فى شغل جوزى، وقتها ممكن يجيب لى هدية بسيطة مش مكلفة، فالحياة قبل الجواز حاجة وبعد الجواز حاجة تانية، حتى الواحد مابقاش يزعل زى الأول».

كثرة المسئوليات والمصاريف جعلت من إبراهيم سعد شخصاً روتينياً، لا يهتم بتواريخ جميع المناسبات، التى تمر عليه أو يلتزم بشراء هدايا كما كان معتاداً فى السابق خلال الفترة قبل الزواج التى يصفها بمرحلة راحة البال والاستمتاع، لحين قدوم طفله الأول: «وقت الخطوبة الواحد كان باله رايق، وبيبقى لازم يشترى هدايا عشان شكله قدام عروسته، والخطوبة أساساً اتعملت عشان نقرب من بعض، ونحتفل بحاجات حلوة، وطبعاً الوضع ده اتغير لما يبقى عندك ولدين، كل يوم ليهم مصاريف وطلبات، وفى وسط الأسعار المرتفعة اللى إحنا حاسين بيها، يبقى الفالنتين لأصحابه».

منذ عدة أشهر، انتهت إجازة زوج إيمان محمود، الذى ينتمى لقرية أطفيح، واضطر إلى السفر للعودة لعمله فى إحدى البلاد خارج مصر، الذى يجعله بعيداً فى أغلب المناسبات، ليقتصر اهتمامه على توفير احتياجات طفله الوحيد وأحواله: «جوزى زى أى راجل مصرى مش بيهتم بالمناسبات دى بعد الجواز، غير اننا من أصول ريفية، وعندنا مابيهتموش بالحاجات دى خالص».