مائدة سحور جماعى فى الشارع: جيران وماشافوش بعض من فترة
أهالى الشارع أثناء السحور
حول مائدة سحور واحدة، تجمع سكان شارع بمنطقة المعصرة فى حلوان، للاحتفال بشهر رمضان، ولتقوية العلاقات وروابط المحبة فى ما بينهم، رافعين شعار «اللمة أحلى فى رمضان».
مصطفى سعيد، أحد منظمى السحور، الذى قام وفريق العمل المكون من 5 شباب من أبناء المنطقة، بالتجهيز للفكرة منذ بداية الشهر الكريم: «قعدنا ندور على فكرة اقتصادية مش مكلفة وفى نفس الوقت نتجمع عن طريقها مع جيراننا وأصحابنا ونرجع الود والذكريات اللى بينا خلال الأيام المفترجة».
وجبة بسيطة مكونة من طواجن الفول، أقراص الطعمية الساخنة، وأصابع البطاطس المقرمشة، تجمع حولها أكثر من 100 شخص من أبناء المنطقة فى جو يسوده الحب والود وتغلّفه الضحكات التى وصل صداها إلى عنان السماء: «السحور أبسط وجبة، فول وزبادى وطعمية وبطاطس وكانوا فرحانين جداً، بدأوا يومهم بطاقة محبة مع السحور، واللى كان مفرحهم اللمة مش الأكل».
"سعيد": هدفنا تقوية العلاقات بيننا
وحسب «سعيد»، فإن الجيران بالمنطقة استقروا على أن يجعلوا يوم الخميس من كل أسبوع خلال الشهر يوماً ثابتاً لإقامة وجبة السحور الجماعية: «اتفاجئنا الحقيقة من رد فعل الجيران والإقبال على المائدة، السحور جمع الكبير والصغير، فيه ناس ماشُفنهاش من فترة كبيرة، وجودهم فرّحنا، بدل ما التجمع ما كان قاصر على الإنترنت، إحنا حاولنا نحققه على أرض الواقع».