طلاب ثانوية عامة يلتقون بعد 26 عاماً من التخرج.. والله زمان

09:15 م | الثلاثاء 02 يوليو 2019

أيام عصيبة تخللها سهر وقلق وتوتر، مرّ عليها 26 عاماً، تذكروها مرة واحدة، فى صورة نكات فكاهية، أطلقوها فيما بينهم فى أول لقاء بعد سنوات طويلة من التخرج، طلاب ثانوية عامة دفعة 1993، استطاعوا أن يجتمعوا ويلموا الشمل ويستعيدوا ذكرياتهم مع الثانوية العامة، بمناسبة الامتحانات التى تجرى حالياً، ولتقديم رسالة للطلاب بأنها ليست نهاية المطاف، فبعدها حياة أخرى ربما تكون أفضل.

"زعتر": ماكناش عارفين بعض "الناس كبرت وشعرها أبيض"

«كان بقالنا 5 سنين بندوّر على بعض، وعملنا جروب على الفيس بوك عشان نقدر نجمّع بعض من تانى، لأن فيه مننا اللى سافر واتغرب واللى انشغل قوى فى الشغل ودوامة الحياة خدته، بس قدرنا إننا نجمع أكتر من 20 واحد من أيام المدرسة».. قالها إيهاب زعتر، 44 عاماً، الذى شعر لأول مرة براحة نفسية كبيرة، وبأنه مُجرّد من المسئوليات والهموم، بعد أن اجتمع مع أصدقاء الصبا، وتذكّر بعض المواقف القديمة: «لما قعدنا مع بعض اكتشفنا إن الأيام ضحكت علينا وكبرنا بسرعة، وقطر الحياة خدنا من نفسنا، حتى إننا من كتر ما كبرنا فضلنا نشبّه على بعض كتير، لأن فيه مننا ناس شعرها ابيضّ».

غالبية الدفعة من محافظة دمياط، لكن هناك من سافر للعمل فى الإسكندرية، لكنهم جاءوا خصيصاً من أجل هذا التجمع: «كلنا سيبنا اللى ورانا واللى قدامنا لمدة كام ساعة همّا دول اللى بيهوّنوا علينا الحياة والظروف والضغوط الصعبة، كفاية إننا اتجمعنا وافتكرنا أيام زمان وضحكنا»، مؤكداً أنهم يخططون لتقوية الروابط فيما بيهم وتكرار اللقاءات التى تجمعهم، والتخطيط للسفر أيضاً.