صيدلية قائمة على التبرعات لعلاج غير القادرين: اتبرع ولو بشريط

08:07 م | الأربعاء 04 سبتمبر 2019

«العلاج مجاناً لمن لا يستطيع شراءه».. هكذا تحرص صيدلية تابعة لعيادة خيرية فى منطقة صفط اللبن، على توفير الدواء مجاناً لغير القادرين، خصوصاً بعد الارتفاع المستمر فى الأدوية، ويتم التوزيع من خلال الروشتة والتقارير الطبية للمرضى.

تعتمد الصيدلية على التبرعات الدوائية، وفقاً للدكتور محسن مصطفى، مسئول الصيدلية: «إحنا فاتحين باب التبرع بالدواء فى أى وقت حتى لو بشريط واحد بس، فى ناس كتير محتاجاه لأن الدواء بيبقى غالى عليهم»، مؤكداً أن الصيدلية تتعاون مع بعض المساجد المحيطة، لجمع تبرعات الأدوية من المواطنين، ويتم توزيع هذه الأدوية بين المرضى غير القادرين: «وكمان بنوزع العلاج للناس العادية يعنى لو حد عايز الدوا ما نقدرش نقفل الباب فى وشه».

توفر الصيدلية خدمة الدليفرى، للحصول على الأدوية: «بنوصل العلاج للناس فى بيوتهم، فيه ناس ما بتقدرش تتحرك وإحنا على تواصل معاهم ومتابعة طبية لحالتهم، وكل أول شهر بنبعت لهم الأدوية اللى محتاجينها حتى لو شريط واحد لحد ما نوفر باقى الدوا»، موضحاً أن هناك قوائم للمرضى غير القادرين، وتتم عملية التوزيع داخل المنطقة والمناطق المجاورة أيضاً.

تقوم الصيدلية بعمل جرد للأدوية، وفقاً لصلاحيتها: «اللى قرب الصلاحية بتاعته تنتهى ده اللى بنوزعه الأول وبعدين نوزع الباقى عشان نضمن سلامة المرضى، وبنقول لكل مريض بيتعامل معانا لما بيجى لنا أو بنروح له اتصل بينا وماتتكسفش تطلب اللى انت عايزه، والأدوية اللى مش متوافرة عندنا بنبعت نجيبها من أماكن تانية».