جسمه سابق سنه: مصطفى طفل.. بس عنده عضلات
جسمه سابق سنه: مصطفى طفل.. بس عنده عضلات
بنيانه العضلى يسبق سنه، طموحه فى أن يصبح بطلاً عالمياً فى كمال الأجسام جعله يرفع الحديد مبكراً، أحمد مصطفى، 14 عاماً، ابن قرية العدوة بمركز ههيا محافظة الشرقية، استطاع حصد المركز الثالث بهذه الرياضة على مستوى محافظته وسطر اسمه فى سجلات الأبطال: «الناس بتقابلنى ومستغربة إن عندى 14 سنة، الكل مستغربنى، كل صحابى بيحبوا الكورة وأنا قررت أختلف عنهم وأمارس رياضة صعبة، وأحقق حلم والدى».
يروى «مصطفى» أنه بدأ منذ عام ممارسة اللعبة والمواظبة على أوقات التمرين: «بدأت أشيل حديد وأنا عمرى 13 سنة، حب المدرب أحمد سليمان ليّا هو اللى خلّانى أكمل، بياخد باله من كل تفصيلة فى التمرين، كتير من أصحابى بييجوا التدريب فى السن ده وبيمشوا ما يقدروش يكملوا، بس أنا قدرت أثبت نفسى، جسمى شكله اتغير فى وقت قصير جداً».
يبحث «مصطفى» بشكل دائم عن الاختلاف والتميز عن غيره: «التمرين بتاعى بيكون يومين فى الأسبوع، يوم بدرَّب عضلة الرجْل والبنش ويوم الكتف، نفسى أبقى لاعب محترف وأسافر أمريكا وأبقى زى بيج رامى لاعب مصر الشهير، هو مثلى الأعلى».
يحاول طوال الوقت تقسيم وقته بين المذاكرة والتمرين: «باحاول أعمل ده لكن الحقيقة التفكير فى اللعبة بياخد الجزء الأكبر من وقتى، لأنى شايف فيها مستقبلى».
وحسب قوله، فإن والده هو مَن يدعمه لاستكمال مشواره: «أبويا نفسه يشوفنى عالمى، بيساعدنى طول الوقت مادياً ومعنوياً»، وتتكلف نفقات التمرين الخاص بـ«مصطفى» نحو 80 جنيهاً: «ده بالإضافة للمكملات الغذائية اللى سعرها بيوصل لـ 250 جنيه».
