مجدي إسحاق: رئيس قسم جراحة القلب بـ"هارفارد" انبهر بمركز أسوان
مجدي إسحاق و الدكتور مجدي يعقوب
قال الدكتور مجدي إسحاق، نائب رئيس مجلس أمناء مؤسسة مجدي يعقوب، إنه لم يكن يعرف الدكتور مجدي يعقوب جراح القلب العالمي بشكل شخصي ولكنه يعرف اسمه فقط، "ليزا بنت مجدي يعقوب قالتلي ما تيجي تقابل بابا عشان تطوروا الخبرات مع بعض، قولتلها تمام"، وذلك خلال حواره في برنامج "معكم"، مع الإعلامية منى الشاذلي، على شاشة "cbc".
وأوضح "إسحاق"، أنه اتفق مع مجدي يعقوب على لقائه في أحد فنادق لندن بجوار مستشفى كان يقوم بها مجدي يعقوب بعمل عملية جراحية بالقلب لأحد الأشخاص، وكان الاتفاق أن المقابلة تتم الساعة الثامنة مساءًا، "استنيت من الساعة 8 حتى الساعة الواحدة فجرًا لحد ما جه، رغم إننا كنا متفقين إننا نتعشى مع بعض وكنت طلبت الأكل عبارة عن سندوتشات".
وتابع: "لما عاد مجدي يعقوب كانت السندوتشات عدى عليها وقت طويل، بقت عاملة زي سندوتشات متاكلة قبل كده"، موضحًا أن هذا الموقف كان بداية تعرفه على مجدي يعقوب، رافضًا في الوقت ذاته أن يصف مركز أسوان لجراحات القلب بأنه أفضل مركز في مصر، "لما حد يقول على نفسه أحسن مركز يبقى نعرف إنه بكاش، لأن الناس لازم هي اللي تقول وتحكم".
وواصل: "مجدي يعقوب عزم واحد رئيس قسم جراحات القلب في جامعة هارفارد عشان يزور مركز جراحات القلب في أسوان، الراجل جه وقعد يومين ودخل شاف غرف العمليات وشاف الأطباء المصريين وهما بيشتغلوا حصله هوس ومبقاش مصدق إن الكلام ده يتم في مصر، كان منبهر جدا، وقالي نفسي أبعت تلاميذي يتدربوا مع الأطباء بتوعكم في أسوان".
وأردف: "الجراح الرئيسي الذي يقوم بإجراء العملية لمريض القلب، بيكون مسؤول عن المريض لحد ما يعدي مرحلة الخطر وبعدين يسلمه للطبيب الأصغر منه، مفيش حاجة اسمها يروح البيت قبل ما المريض بتاعة يعدي مرحلة الخطر".