شقيقان استغلا أوقات الحظر بسبب فيروس كورونا، ومكوث المواطنين في منازلهم خاصة خلال شهر رمضان الكريم، واستطاعا تحويل "الكراكيب" الموجودة فوق سطح منزلهما إلى مكان للسهر وصالة جيم مزودة بخيمة رمضانية، ومساحة الترويح عن النفس، وذلك بأدوات بسيطة وبتكلفة متواضعة.
وضع الشقيقين أحمد حسين، 22 عاماً، وإبراهيم، 20 عاماً، الطالبين بكلية التربية الرياضية بجامعة كفر الشيخ، كل ما يحتاجونه لتجميل سطح منزلهما في منطقة الصفا، بمدينة بيلا، وحوّلوه إلى صالة چيم وخيمة رمضانية، قبل حلول شهر رمضان المبارك بأيام قليلة، واستخدما أقمشة خيام كستائر، كما علقا الزينة والفوانيس الصغيرة الملونة، وجلبا بعض الأدوات والأجهزة الرياضية البسيطة المستخدمة فى الجيمات، واتخذا من هذه المساحة مكاناً لممارسة الرياضة، وتناول الفطور والسحور مع أسرتهما وأصحابهما.
"بعد الكورونا، الدنيا وقفت وفكرت استغل السطح أنا وأخويا ووصلنا إننا نحوله لصالة چيم وخيمة رمضانية بمناسبة شهر رمضان"، كلمات قالها أحمد حسين، مضيفاً:"بما أن مفيش خروجات، فبنسهر بالليل أنا وأصحابي، وقبل الفطار أخويا يتمرن وأنا بعد الفطار، بطلع اتمرن مع نفسى وبعديين أصحابي بياجو يسهروا معايا، بس أحنا اللى بنستفاد من التمرين أكيد يعنى، وبليل القاعدة حلوة".
1200 جنيهاً، قيمة تكاليف تجهيز السطح بحسب أحمد:" تجميل السطح تكلف حوالي 1200 جنيه، واشترينا نجيل صناعي، وأدوات للتمارين، وعملنا قاعدة ظريفة كده في الليل، وكان فيه تشجيع كبير من الأسرة علشان معتش أطلع وأفضل قاعد فى البيت وهما اللى شجعوني على كدا، وأصحابي أول ما شافوا المكان حبوا القاعدة وبدل ما يقعدو فى البيت بيجوا يقعدوا عندى ونقعد ونسهر، وناس كتير من الجيران سألونا عن كيفية تجهيز المكان علشان يبدأو يجهزوا سطوحهم".
طريقة التنفيذ يشرحها إبراهيم:" رمضان هذه المرة مختلف عن أي سنة، من غير دورات رمضانية بالنسبة لي مش رمضان، بس الجو اللى إحنا عاملينه بيحسسنا بأجواء رمضان شوي، أول ما بدأ الحظر والنوادي قفلت، بدأت أفكر أنا وأحمد إزاى نسلى وقتنا من ناحية القعدة الحلوة، ونستفاد ونتمرن، فكرنا واتفقت أنا وهو واقترحت الفكرة على أسرتي وكانوا موافقين جدا يعنى، روحنا مظبطين السطح، وغسلناه كويس، ورحنا اشترينا نجيلة صناعية، وقماش خيامية عليه زينة رمضان ونور، وكان عندنا بلايستيشن وشاشة طلعناهم فوق السطح".
يضيف إبراهيم:"من ناحية الرياضة الصبح علشان أنا وأخويا فى تربية رياضيه وبنحب الرياضة عملنا إستب خشب، وصندوق خشب، ودنابل حديد، وحبل نط، واستك، وسوستة، ومشاية للجرى، وكوتشين عجل، وبدأنا نتمرن الصبح أنا وأحمد ومحمد ابن خالتى ونتمرن كل يوم وبليل نطلع نقعد شوية في الهوا ونلعب بلستيشن ونهزر".
لم يستغرق تجهيز السطح أكثر من 3 أيام وبتكلفة لم تزد على 1200 جنيهاً:" التكلفة كانت غالية شويتين، عملنا الخشب بـ300جنيه، والنجيلة بـ400 جنيه، والقماش بـ60 جنيه، والدنابل الحديد بـ280جنيه، والأستك بـ150جنيه لأنه نضيف جدا، والمشاية كانت عندنا جاية من السعودية، والنور بـ50جنيه بس كدا، وأصحابنا انبهروا من شكل السطح وفكروا فى التنفيذ عندهم، والفكرة طلعت حلوة، وبنحتفل برمضان علشان الواحد زعلان بسبب غلق الجوامع، ومفيش زيارات ولا أيام رمضان الجميلة زى كل سنة عملنا كدا بنفس الشكل على أساس خيمة رمضانية نقعد شوية بدل ما كل حاجة مقفولة".
تعليقات الفيسبوك